سابق امیر جماعت اسلامی سراج الحق نے پاکستان میں مقیم افغان مہاجر طلبہ کے تعلیمی مستقبل پر شدید تشویش کا اظہار کرتے ہوئے کہا ہے کہ ہزاروں افغان مہاجر طلبہ کے تعلیمی سال ضائع ہو رہے ہیں، جو ایک سنگین انسانی اور تعلیمی مسئلہ بنتا جا رہا ہے۔
تفصیلات کے مطابق سماجی رابطے کی ویب سائٹ ایکس (سابقہ ٹوئٹر) پر جاری اپنے بیان میں سراج الحق نے حکومت پاکستان سے مطالبہ کیا کہ وہ انسانی ہمدردی اور تعلیمی تقاضوں کو مدنظر رکھتے ہوئے افغان مہاجر طلبہ کے لیے ترجیحی بنیادوں پر خصوصی سہولتیں فراہم کرے، تاکہ وہ بغیر کسی رکاوٹ اپنی تعلیم جاری رکھ سکیں۔
انہوں نے کہا کہ تعلیم کسی بھی قوم کی ترقی کی بنیاد ہوتی ہے اور اگر مہاجر طلبہ کو تعلیم سے محروم رکھا گیا تو اس کے اثرات نہ صرف ان طلبہ بلکہ پورے معاشرے کے مستقبل پر پڑیں گے۔ سراج الحق کا کہنا تھا کہ تعلیمی تسلسل کا متاثر ہونا نوجوانوں میں مایوسی، بے روزگاری اور سماجی مسائل کو جنم دے سکتا ہے۔
سابق امیر جماعت اسلامی نے زور دیا کہ پاکستان نے ہمیشہ مہاجرین کے لیے فراخ دلی کا مظاہرہ کیا ہے اور موجودہ حالات میں بھی تعلیمی شعبے میں انسان دوست پالیسی اپنانا وقت کی اہم ضرورت ہے۔ ان کے مطابق حکومت کو چاہیے کہ افغان مہاجر طلبہ کے داخلوں، تعلیمی دستاویزات اور رہائشی مسائل کے حل کے لیے واضح اور عملی اقدامات کرے۔
انہوں نے کہا کہ تعلیم کو سیاست سے بالاتر رکھا جانا چاہیے اور افغان مہاجر طلبہ کو مواقع فراہم کر کے نہ صرف انسانی اقدار کا تحفظ کیا جا سکتا ہے بلکہ خطے کے روشن مستقبل کی بنیاد بھی رکھی جا سکتی ہے۔
