ملک میں سونے کی قیمت ریکارڈ سطح پر، عالمی مارکیٹ میں بھی اضافہ، سرمایہ کاروں کے لیے اہم سوال، اگلے پانچ سال میں سونے کی قیمت کس رخ پر جائے گی؟
ملک میں سونے کی قیمت ریکارڈ سطح پر پہنچ گئی ہے۔ مقامی مارکیٹ میں سونا 4 لاکھ 70 ہزار 862 روپے فی تولہ تک پہنچ چکا ہے، جبکہ عالمی مارکیٹ میں سونے کے نرخ فی اونس 4485 ڈالر ہو چکے ہیں، جس میں مزید اضافہ متوقع ہے۔
سرمایہ کار اور عام لوگ یہ جاننے کے لیے بے چین ہیں کہ کیا سونے کی قیمت میں اضافہ جاری رہے گا یا اس میں گراوٹ آئے گی۔ اس حوالے سے قیمتی دھاتوں کے ڈیلر اور سٹوریج فراہم کرنے والی کمپنی سلور بلین کے بانی گریگرسن نے اپنے خیالات کا اظہار کیا۔
گریگرسن کے مطابق، عالمی معیشت کی غیر یقینی صورتحال کے پیش نظر، بہت سے سرمایہ کار، بینک اور امیر خاندان سونے کو ایک محفوظ سرمایہ کاری سمجھ رہے ہیں۔ انہوں نے کہا کہ ان کے صارفین زیادہ تر طویل عرصے تک سونا اپنے پاس رکھتے ہیں اور اکثریت چار سال یا اس سے زیادہ عرصے تک سونا محفوظ رکھتی ہے۔
گریگرسن نے مزید کہا کہ کسی نہ کسی وقت سونے کی قیمت میں گراوٹ ممکن ہے، لیکن موجودہ معاشی حالات کو دیکھتے ہوئے ان کا ماننا ہے کہ کم از کم اگلے پانچ سال تک سونے کی قیمتوں میں اضافے کا رجحان برقرار رہنے کی توقع ہے۔
ماہرین کے مطابق، سرمایہ کاروں کے لیے سونے میں سرمایہ کاری ایک محفوظ اور مستقبل کے لیے فائدہ مند آپشن بنی ہوئی ہے، خاص طور پر جب عالمی مارکیٹ میں غیر یقینی صورتحال بڑھتی جا رہی ہے۔
