رمضان المبارک ہر مسلمان کے لیے روحانی سکون اور عبادات میں خشوع کے حصول کا مہینہ ہے، اور اسی دوران دنیا بھر کے لاکھوں مسلمان حجاز مقدس کا رخ کر کے مسجد الحرام اور مسجد نبوی ﷺ میں عمرہ کی سعادت حاصل کرتے ہیں۔
اس حوالے سے سعودی عرب نے معتمرین کے لیے عمرہ ویزا اور مقدس شہروں میں قیام و نقل و حرکت کو آسان بنانے کے لیے کئی سہولیات فراہم کی ہیں۔
سعودی وزارت خارجہ کے مطابق عمرہ ویزا حاصل کرنے کے لیے معتمدہ ذرائع میں الیکٹرانک ویزا پلیٹ فارم، منظور شدہ بیرونی ایجنٹس اور نسک پلیٹ فارم شامل ہیں، جو لائسنس یافتہ سروس فراہم کنندگان کے ذریعے مکمل پیکیجز پیش کرتے ہیں۔
معتمرین کو مسجد الحرام میں داخل ہونے سے قبل نسک ایپ کے ذریعے سرکاری اجازت نامہ حاصل کرنا لازمی ہے۔ یہ ایپ نماز کے اوقات، رش کے اوقات کی نشاندہی، الیکٹرانک انٹری کوڈ، ریاض الجنۃ کی زیارت کی بکنگ اور متعدد زبانوں میں رہنمائی فراہم کرتی ہے، جس سے دنیا بھر کے معتمرین کو منظم کرنا آسان ہو گیا ہے۔
ٹرانزٹ ویزا مخصوص شرائط کے تحت 96 گھنٹے تک قیام اور عمرہ کی اجازت دیتا ہے، جبکہ عمرہ ویزا رکھنے والے معتمرین اپنی مدت کے دوران سعودی عرب کے تمام علاقوں میں آزادانہ نقل و حرکت کر سکتے ہیں۔
شاہ عبدالعزیز انٹرنیشنل ایئرپورٹ اور مکہ مکرمہ کے درمیان حرمین ایکسپریس ٹرین، بسیں، ٹیکسیز اور اسمارٹ ٹرانسپورٹ ایپس کے ذریعے سفر ممکن ہے۔ اسی طرح مدینہ منورہ کے لیے بھی ٹرین، ہوائی جہاز اور بسوں کے ذریعے روانگی آسان ہے۔
مسجد الحرام اور مسجد نبوی میں معتمرین کے لیے دستی اور الیکٹرک وہیل چیئرز، رہنمائی مراکز، فوری ترجمے، سامان رکھنے کے مراکز، آب زمزم کی فراہمی اور ریاض الجنۃ کی زیارت کی سہولیات فراہم کی گئی ہیں۔
یہ بھی پڑھیں : عمران خان کی ڈیل مسترد کرنے کی خبر پر رانا ثناء کی وضاحت سامنے آ گئی
نسک کے ذریعے ان تمام خدمات کو مربوط انداز میں پیش کیا جاتا ہے تاکہ معتمرین کو آرام اور سلامتی کے اعلیٰ معیار فراہم کیے جا سکیں۔
متعلقہ حکام نے زور دیا ہے کہ معتمرین سکون، نظم و ضبط، عبادت میں خلل ڈالنے والی فوٹوگرافی سے گریز اور ممنوعہ اشیا نہ لائیں۔
ساتھ ہی سفر سے قبل صحت کے انتظامات اور واپسی کی ہدایات پر عمل کرنا لازمی ہے تاکہ ایک محفوظ اور آرام دہ تجربہ یقینی بنایا جا سکے۔
یہ جدید اور مربوط نظام سعودی مملکت کی ماہِ رمضان کے دوران معتمرین کے لیے اسمارٹ، منظم اور محفوظ انتظامات کے عزم کی عکاسی کرتا ہے، جو تکنیکی اور تنظیمی ہم آہنگی پر مبنی ہے۔
