اسلام آباد: محکمہ ہائی وے نے صوبے بھر کے مینول ٹول پلازوں کو ڈیجیٹل کرنے کا فیصلہ کر کے عوامی سہولت اور نظام میں شفافیت کو یقینی بنانے کی جانب اہم قدم اٹھایا ہے۔
یہ فیصلہ صوبائی وزیر تعمیرات و مواصلات ملک صہیب احمد بھرتھ کی زیر صدارت اجلاس میں کیا گیا، جس میں ٹول پلازوں کی ڈیجیٹلائزیشن کے عمل کا تفصیلی جائزہ لیا گیا۔
صوبائی وزیر نے اجلاس کے دوران بتایا کہ محکمہ ہائی وے کے 41 ٹول پلازوں کو مرحلہ وار ڈیجیٹل کیا جائے گا، اور کیش کولیکشن کے نظام کو جدید ڈیش بورڈ کے ذریعے بہتر بنایا جائے گا تاکہ اوورچارجنگ اور کرپشن کے امکانات کم ہوں۔
اجلاس میں ٹول پلازوں پر اوور چارجنگ کی شکایات کا تفصیلی جائزہ بھی لیا گیا اور فیلڈ افسران کی سرزنش کی گئی۔ ہدایت کی گئی کہ اوورچارجنگ میں ملوث افراد کے خلاف سخت کارروائی کرتے ہوئے مقدمات درج کیے جائیں تاکہ عوام کا اعتماد بحال ہو۔
مزید برآں عوامی سہولت کے لیے تمام ٹول پلازوں پر ایم ٹیگ کی سہولت فراہم کی جائے گی، جس سے گاڑیوں کی آمد و رفت اور ادائیگی کے عمل میں شفافیت آئے گی۔
یہ بھی پڑھیں : چین کی پیپلز لبریشن آرمی نیوی کا جہاز ‘داچھنگ’ پاکستان پہنچ گیا، پاک فوج کا پرتپاک استقبال
محکمہ ہائی وے کے حکام کے مطابق ٹول پلازوں کے انفراسٹرکچر کو بھی اپ گریڈ کیا جا رہا ہے تاکہ نظام کو جدید تقاضوں کے مطابق بنایا جا سکے۔
اس اقدام سے نہ صرف عوامی سہولت میں اضافہ ہوگا بلکہ ٹول وصولی کے نظام میں شفافیت اور مؤثریت کو بھی فروغ ملے گا، جبکہ اوورچارجنگ اور بدعنوانی کے امکانات کم ہوں گے، جس سے عوام میں اعتماد اور اعتماد سازی میں اضافہ ہوگا۔
