پاکستان تحریک انصاف کی پارلیمانی کمیٹی کے پہلے اجلاس میں سینیٹ انتخابات سے متعلق اہم فیصلے کیے گئے ہیں۔ غیر متوقع طور پر پارٹی نے اپنے تمام امیدواروں کو فوری طور پر کاغذات نامزدگی جمع کرانے سے روک دیا ہے۔
پی ٹی آئی کے رہنما جنید اکبر نے واضح ہدایات جاری کرتے ہوئے کہا کہ کوئی بھی کارکن آج اپنے کاغذات نامزدگی جمع نہ کرائے۔ انہوں نے بتایا کہ پارلیمانی کمیٹی کل سینیٹ کی خالی نشست کے لیے حتمی امیدوار اور کورنگ امیدوار کا باضابطہ اعلان کرے گی، جس کے بعد منگل کے روز نامزد امیدوار اپنے کاغذات جمع کرائیں گے۔
سیاسی حلقوں کے مطابق پی ٹی آئی کی یہ حکمت عملی اندرونی مشاورت اور کسی بڑے سرپرائز کا حصہ معلوم ہوتی ہے۔ پارٹی قیادت نے اس غیر متوقع فیصلے کے ذریعے اپنے امیدواروں اور کارکنان میں یکسوئی پیدا کرنے اور انتخابات کی تیاری کو مستحکم بنانے کا ارادہ ظاہر کیا ہے۔
