امریکی صدر ڈونلڈ ٹرمپ نے اپنی افواج کو ایک روز کے لیے ایران پر حملے روکنے کا حکم دے دیا ہے۔
امریکی ویب سائٹ ایگریوس کے مطابق صدر ٹرمپ نے سفارت کاری کو موقع دینے کا فیصلہ کرتے ہوئے جمعے کے روز امریکی فوج کو ایران پر نئے حملے نہ کرنے کی ہدایت جاری کی، جس کے بعد گزشتہ تقریباً دو ہفتوں سے جاری روزانہ کے حملوں کا سلسلہ تھم گیا ہے۔
رپورٹ کے مطابق اگر صدر ٹرمپ دوبارہ حملوں کا حکم دیتے ہیں تو امریکی فوج انتہائی مختصر نوٹس پر دوبارہ کارروائی شروع کرنے کی مکمل صلاحیت رکھتی ہے۔
یہ بھی پڑھیں: ٹرمپ کی ایران کو بڑے فوجی آپریشن کی دھمکی، ایران کا ردعمل سامنے آگیا
دوسری جانب ذرائع کے مطابق ایک عمانی وفد جمعے کے روز آبنائے ہرمز کو دوبارہ کھولنے کے نئے انتظامات پر بات چیت کے لیے تہران پہنچا تھا، جہاں مذاکرات میں اہم پیشرفت ہوئی ہے۔ امکان ظاہر کیا جا رہا ہے کہ عمان اور ایران کے درمیان ہفتے کے اختتام تک اس حوالے سے معاہدہ طے پا جائے گا۔
