سیکیورٹی فورسز نے ضلع ڈی آئی خان کے گاؤں سکندر شمالی میں خوارج کی موجودگی کی اطلاع پر ایک کامیاب انٹیلی جنس پر مبنی آپریشن کیا،جس کے نتیجے میں 2 دہشت گرد ہلاک ہوگئے۔ فورسز کے آپریشن میں دہشت گردوں کا گٹھ جوڑ اور ان کے پناہ گزین مقامات کو نشانہ بنایا گیا۔
ذرائع کے مطابق سیکیورٹی فورسز نے خفیہ اطلاع پر کارروائی کی، جس میں دہشت گردوں کو قابو کیا گیا۔ اس آپریشن کے دوران کوئی سیکیورٹی اہلکار زخمی نہیں ہوا، اور تمام ہلاک دہشت گردوں کا تعلق شدت پسند تنظیم سے تھا۔
یاد رہے کہ گزشتہ روز بھی سیکیورٹی فورسز نے جنڈولہ کے علاقے میں آپریشن کے دوران 10 خوارج کو ہلاک کیا تھا۔ اس کے علاوہ، پچھلے ماہ فروری میں دہشت گردوں کے خلاف ہونے والی کارروائیوں میں مجموعی طور پر 156 دہشت گرد مارے گئے تھے، جس سے سیکیورٹی فورسز کی کامیاب حکمت عملی اور پیشہ ورانہ صلاحیتوں کا واضح مظاہرہ ہوا۔
یہ بھی پڑھیں ڈی آئی خان: اسمگل شدہ پیٹرول کی فروخت کے خلاف احتجاج
پاکستان کی عوام نے دہشت گردوں کے خلاف اس کامیاب کارروائی پر سیکیورٹی فورسز کی بے پناہ قربانیوں اور محنت کو سراہا ہے اور ان کے شانہ بشانہ کھڑے ہونے کا عہد کیا ہے۔ حکومتی حلقوں اور عوامی نمائندوں نے سیکیورٹی فورسز کی پیشہ ورانہ صلاحیتوں کی تعریف کرتے ہوئے انہیں خراج تحسین پیش کیا ہے۔
پاکستان کے عوام ایک بار پھر اس عزم کا اعادہ کرتے ہیں کہ وہ خوارج کے خلاف جنگ میں سیکیورٹی فورسز کے شانہ بشانہ کھڑے رہیں گے، اور دہشت گردوں کے خلاف کامیاب آپریشنز کے لیے اپنے مکمل تعاون کا یقین دلائیں گے۔
