اسلا م آباد: پاکستان میں موٹر سائیکل کے شوقین افراد کے لیے اہم خبر سامنے آگئی، ہونڈا سی جی 125 کا نیا ماڈل پاکستان میں لانچ کردیا گیا ہے۔
نئے ماڈل کو نئے گرافکس اور بیرونی ڈیزائن کے ساتھ پیش کیا گیا ہے، جبکہ سی جی 125 سیلف اور گولڈ ورائٹیز بھی لائن اپ کا حصہ بنادی گئی ہیں۔
ہونڈا سی جی 125 کئی برسوں سے پاکستانی مارکیٹ میں مقبول موٹر سائیکلوں میں شمار ہوتی ہے، جس کے باعث نئے ماڈل کی آمد نے صارفین کی توجہ حاصل کرلی ہے۔ خریداروں کی نظریں نئی موٹر سائیکل کی قیمت، ڈیزائن اور تکنیکی خصوصیات پر مرکوز ہیں۔
نئے ماڈل میں نمایاں تبدیلیاں اس کی اسٹائلنگ اور گرافکس میں کی گئی ہیں۔ گولڈ ورائٹی میں منفرد ایکسٹیریئر فنش متعارف کرایا گیا ہے، جبکہ سی جی 125 سیلف ان صارفین کے لیے پیش کی گئی ہے جو موٹر سائیکل اسٹارٹ کرنے کے لیے زیادہ آسان آپشن چاہتے ہیں۔
یہ بھی پڑھیں : پشاور کے طبی و تجارتی مراکز میں فائر سیفٹی انتظامات نامکمل، بڑے نقصان کا خدشہ
دستیاب معلومات کے مطابق کمپنی نے فی الحال انجن میں کسی بڑی مکینیکل تبدیلی کی تصدیق نہیں کی۔ نئی سی جی 125 کی تشہیر میں طاقت، پک اَپ اور روایتی انجن ساؤنڈ کو نمایاں کیا گیا ہے، تاہم انجن کی کارکردگی یا تکنیکی صلاحیت میں بڑے اپ گریڈ کی تفصیلات سامنے نہیں آئیں۔
کمپنی کی جانب سے نئے ماڈل کی قیمت بھی تاحال باضابطہ طور پر ظاہر نہیں کی گئی۔ قیمت سامنے آنے کے بعد ہی اندازہ ہوسکے گا کہ نئی سیلف اور گولڈ ورائٹیز صارفین کے لیے کس حد تک قابلِ رسائی ثابت ہوتی ہیں۔
نئی سی جی 125 کو مجموعی طور پر بڑے مکینیکل اپ گریڈ کے بجائے تازہ اسٹائل، نئے گرافکس اور اضافی ورائٹیز کے ساتھ پیش کیا گیا ہے، جبکہ صارفین کو اب کمپنی کی جانب سے قیمت اور مکمل اسپیکس کے اعلان کا انتظار ہے۔
