خیبرپختونخوا پولیس نے صوبے بھر میں جدید ڈیجیٹل ڈرائیونگ لائسنس سسٹم کا آغاز کر دیا ہے جس کے تحت شہری اب اپنا ڈرائیونگ لائسنس موبائل فون پر محفوظ کر کے موقع پر پیش کر سکیں گے۔
اس سہولت سے فائدہ اٹھانے کے لیے شہری رابطہ ایپ کے ذریعے اپنا قومی شناختی کارڈ نمبر درج کر کے چند منٹوں میں آن لائن ای-لائسنس حاصل کر سکتے ہیں۔ ڈیجیٹل لائسنس کو ٹریفک اہلکار کے مطالبے پر موبائل اسکرین پر دکھایا جا سکے گا۔
حکام نے پشاور ٹریفک پولیس کو ہدایت جاری کی ہے کہ ڈیجیٹل لائسنس کو قانونی طور پر معتبر تسلیم کیا جائے گا۔ اگر کسی شہری کے پاس فزیکل لائسنس موجود نہ ہو لیکن وہ موبائل پر درست ڈیجیٹل لائسنس دکھا دے، تو اس کا چالان نہیں کیا جائے گا۔
یہ بھی پڑھیں : پاکستان ویمن ٹیم کی کپتان فاطمہ ثنا پر جرمانہ عائد
اس اقدام سے کاغذی دستاویزات ساتھ رکھنے کی ضرورت ختم ہو جائے گی اور سڑکوں پر چیکنگ کا عمل تیز اور شفاف ہوگا۔ چیف ٹریفک آفیسر پشاور ڈاکٹر محمد زاہد نے اسے ٹریفک پولیس کے نظام میں جدید ٹیکنالوجی کے استعمال کا اہم سنگِ میل قرار دیا ہے۔
