بلاول بھٹو نے صوبوں کے معاملے پر پارلیمنٹ میں بحث کیلئے حامی بھرلی

پاکستان پیپلز پارٹی کے چیئرمین بلاول بھٹو زرداری نے کہا ہے کہ صوبوں کے قیام کے حوالے سے ہماری پارٹی کا موقف بالکل واضح ہے، اور وہ اس اہم معاملے پر پارلیمنٹ میں کھل کر بحث کرنے کے لیے تیار ہیں۔

لندن میں میڈیا سے گفتگو کرتے ہوئے بلاول بھٹو نے کہا کہ پاکستان کو اس وقت جو چیلنجز درپیش ہیں، ان کا حل کسی ایک سیاسی جماعت کے پاس نہیں ہے بلکہ تمام جماعتوں کو مل کر سوچنا ہوگا۔

وفاقی وزیرِ داخلہ محسن نقوی کے حالیہ بیان پر ردعمل دیتے ہوئے انہوں نے کہا کہ ہر ایک کو اپنی رائے کا حق حاصل ہے، لیکن اس ایشو پر قومی اسمبلی میں باقاعدہ بحث ہونی چاہیے۔

انہوں نے تنقید کرتے ہوئے کہا کہ محسن نقوی پارلیمان میں کم آتے ہیں، اس لیے بزنس فورمز کے بجائے انہیں پارلیمان کا رخ کرنا چاہیے۔

بلاول بھٹو کا مزید کہنا تھا کہ اگر سسٹم فیل ہوا ہے تو اس بات پر بھی قومی اسمبلی میں سنجیدہ بحث کی ضرورت ہے کہ آخر سسٹم کیوں ناکام ہوا اور اس کا اصل حل کیا ہے۔