اسلام آباد: ٹیکس دہندگان کو سرکاری ڈیوٹیز اور ٹیکسوں کی ادائیگی میں سہولت فراہم کرنے کے لیے بینکوں کے اوقات کار آج رات 10 بجے تک بڑھا دیے گئے ہیں۔
اسٹیٹ بینک کے مطابق بینکوں کے اوقات کار میں اضافے کا فیصلہ فیڈرل بورڈ آف ریونیو (ایف بی آر) کی درخواست پر کیا گیا ہے۔ اعلامیے کے مطابق تمام کمرشل بینکوں کی شاخیں آج رات 10 بجے تک کھلی رہیں گی۔
اسٹیٹ بینک نے بینکوں کو ہدایت کی ہے کہ اپنی متعلقہ شاخیں اس وقت تک کھلی رکھی جائیں جب تک سرکاری ٹرانزیکشنز کے لیے خصوصی کلیئرنگ کی سہولت درکار ہو۔
اعلامیے میں مزید کہا گیا ہے کہ سرکاری ڈیوٹیز اور ٹیکسوں کی آن لائن ادائیگی کے لیے انٹرنیٹ بینکنگ، موبائل ایپلی کیشنز، اے ٹی ایمز اور دیگر ڈیجیٹل پلیٹ فارمز پر خدمات بھی بلا تعطل جاری رکھی جائیں۔
ایف بی آر کی ٹیکس دہندگان کو یاد دہانی
دوسری جانب ایف بی آر نے ٹیکس گوشوارے جمع کرانے والے افراد کو یاد دہانی کراتے ہوئے کہا ہے کہ ٹیکس سال کے گوشوارے جمع کرانے کی آج آخری تاریخ ہے۔
ایف بی آر کے مطابق ٹیکس دہندگان مقررہ وقت کے اندر اپنے انکم ٹیکس ریٹرنز جمع کرادیں تاکہ انہیں جرمانوں اور دیگر قانونی کارروائی سے بچنے میں مدد مل سکے۔
ایف بی آر نے ٹیکس دہندگان پر زور دیا ہے کہ وہ آخری وقت کا انتظار کرنے کے بجائے بروقت اپنے گوشوارے مکمل کرکے جمع کرائیں۔
گھر بیٹھے آن لائن گوشوارے جمع کرانے کی سہولت
ایف بی آر نے ٹیکس دہندگان کو آن لائن نظام سے فائدہ اٹھانے کی ہدایت بھی کی ہے۔ شہری ایف بی آر کی ویب سائٹ کے ذریعے اپنے ٹیکس گوشوارے جمع کراسکتے ہیں، جبکہ ٹیکس آسان ایپ بھی اس مقصد کے لیے استعمال کی جاسکتی ہے۔
یہ بھی پڑھیں : بجٹ خسارہ پورا کرنے کیلئے حکومت کا 7 ہزار 20 ارب روپے قرض لینے کا منصوبہ
ایف بی آر کا کہنا ہے کہ آن لائن نظام کے ذریعے ٹیکس دہندگان گھر بیٹھے اپنے گوشوارے جمع کراسکتے ہیں، جس سے ٹیکس دفاتر جانے کی ضرورت بھی کم ہوجاتی ہے۔
آخری تاریخ گزرنے کے بعد جرمانوں کا سامنا ہوسکتا ہے
ایف بی آر نے واضح کیا ہے کہ مقررہ تاریخ تک ٹیکس گوشوارے جمع نہ کرانے والے افراد کو جرمانوں کا سامنا کرنا پڑسکتا ہے۔
ٹیکس دہندگان کو ہدایت کی گئی ہے کہ وہ اپنی ٹیکس ریٹرنز بروقت جمع کرائیں تاکہ مقررہ مدت گزرنے کے بعد پیدا ہونے والی قانونی پیچیدگیوں سے بچا جاسکے۔
ایف بی آر کے مطابق ٹیکس گوشوارے جمع کرانے کے طریقہ کار یا ٹیکس سے متعلق کسی معاملے میں رہنمائی کے خواہش مند افراد ایف بی آر کی ہیلپ لائن سے رابطہ کرسکتے ہیں۔ اس کے علاوہ قریبی ایف بی آر دفتر سے بھی ضروری معلومات اور معاونت حاصل کی جاسکتی ہے۔
