وزیراعلیٰ خیبر پختونخوا علی امین گنڈا پور نے کہا ہے کہ صوبے میں امن و خوشحالی کے نئے باب رقم کیے جا رہے ہیں اور عوام کے اعتماد کو عملی اقدامات سے سچ ثابت کیا جائے گا۔
انہوں نے یہ بات ڈی آئی خان کی پولیس لائنز میں یومِ آزادی کے موقع پر منعقدہ پروقار تقریب سے خطاب کرتے ہوئے کہی، جہاں انہوں نے پرچم کشائی کی، یادگارِ شہداء پولیس پر سلامی دی اور پھولوں کی چادر چڑھائی۔
قومی اخبار (روزنامہ جنگ ویب سائٹ)کےمطابق وزیراعلیٰ نے اپنے خطاب میں خیبر پختونخوا سمیت پوری قوم کو جشن آزادی کی مبارکباد دیتے ہوئے کہا کہ’’یہ دن ہمیں قربانیوں، اتحاد اور استقلال کی یاد دلاتا ہے، اور ہمیں عہد کرنا ہے کہ ہم اس ملک کو امن و ترقی کی راہ پر گامزن رکھیں گے۔‘‘
علی امین گنڈا پور نے خیبر پختونخوا پولیس کو خراجِ تحسین پیش کرتے ہوئے کہا کہ’’صوبے میں امن و امان کے قیام کے لیے پولیس کی قربانیاں ناقابلِ فراموش ہیں۔ ان ہی کی لازوال جدوجہد کی بدولت آج ہم آزادی کا جشن پورے وقار سے منا رہے ہیں۔‘‘
وزیراعلیٰ نے کہا کہ عوام نے ہمیں منتخب کیا ہے اور ہم ان کی امیدوں پر پورا اتریں گے۔ ان کا کہنا تھا کہ’’عوام کے اعتماد اور محبت کو عملی اقدامات سے سچ ثابت کریں گے۔ ہمارا ہر قدم عوام کی فلاح و بہبود اور صوبے کی ترقی کے لیے ہے۔‘‘
انہوں نے نوجوانوں کو صوبے کا قیمتی سرمایہ قرار دیتے ہوئے کہا کہ’’روشن پاکستان کے لیے نوجوانوں کو بہترین مواقع فراہم کیے جائیں گے۔ تعلیم، ہنر اور روزگار کے شعبوں میں انقلابی اقدامات کیے جا رہے ہیں تاکہ نوجوان نسل کو بااختیار اور خودمختار بنایا جا سکے۔‘‘
علی امین گنڈا پور کا کہنا تھا کہ خیبرپختونخوا میں امن، ترقی، انصاف اور عوامی خدمت کی بنیاد پر ایک نئے دور کا آغاز ہو چکا ہے، جس کے ثمرات ہر ضلع اور ہر شہری تک پہنچائے جائیں گے۔
