پاکستان کرکٹ سے جڑی ایک بڑی خوشخبری سامنے آئی ہے، جہاں شائقین کرکٹ کو جلد ایک زبردست انٹرنیشنل ایونٹ دیکھنے کو ملے گا۔
نجی ٹی وی چینل (جیو نیوز)کے مطابق پاکستان کرکٹ بورڈ (پی سی بی) نے نومبر میں تین ملکی ٹی20 سیریز کرانے کا پلان تیار کر لیا ہے، جس میں افغانستان اور سری لنکا کی ٹیموں کو مدعو کیا جا رہا ہے۔
ذرائع کے مطابق سیریز کے حوالے سے معاملات حتمی مراحل میں داخل ہو چکے ہیں۔ افغانستان کرکٹ بورڈ نے سیریز میں شمولیت میں دلچسپی ظاہر کر دی ہے، جبکہ سری لنکا کی ٹیم پہلے ہی نومبر میں پاکستان کا دورہ کرنے والی ہے۔
تین ملکی سیریز کے لیے 15 سے 30 نومبر کی ونڈو رکھی گئی ہے، اور تمام میچز لاہور اور راولپنڈی میں کھیلے جانے کا امکان ہے۔
سری لنکا نومبر میں پاکستان کے خلاف وائٹ بال سیریز کھیلنے آ رہا ہے، جس میں 3 ون ڈے اور 3 ٹی20 میچز شامل ہیں۔ پی سی بی کی کوشش ہے کہ اس ٹی20 سیریز کو تین ملکی سیریز کی شکل دی جائے تاکہ مداحوں کو مزید دلچسپ اور سنسنی خیز کرکٹ دیکھنے کو ملے۔
یہ تین ملکی سیریز جنوبی افریقا کے خلاف ہوم سیریز کے فوراً بعد شروع ہوگی۔ جنوبی افریقا کے خلاف آخری ون ڈے میچ 8 نومبر کو فیصل آباد میں شیڈول ہے۔
تین ملکی ٹی20 سیریز سے پہلے پاکستان اور سری لنکا کے درمیان تین ون ڈے میچز کھیلے جانے کا امکان ہے، جن کی ممکنہ تاریخیں درج ذیل ہیں
11 نومبر
13 نومبر
15 نومبر
تین ملکی ٹی20 سیریز میں متوقع ٹیمیں:
پاکستان
افغانستان
سری لنکا
تین ملکی سیریز کا انعقاد پاکستانی سرزمین پر ایک اور بڑا انٹرنیشنل ایونٹ ہوگا، جو نہ صرف شائقین کے جوش و خروش میں اضافہ کرے گا بلکہ پاکستان میں عالمی کرکٹ کی مکمل بحالی کی جانب بھی اہم قدم ثابت ہوگا۔
