وزیراعظم شہباز شریف نے کہاہے کہ وہ فیلڈ مارشل اور افواجِ پاکستان کو خراجِ تحسین پیش کرتے ہیں جنہوں نے ملک کے دفاع میں تاریخی کردار ادا کیا۔
چترال میں دانش اسکول کے سنگِ بنیاد کی تقریب سےخطاب میں ان کا کہنا تھاکہ بھارت کو چار دن کی جنگ میں عبرتناک شکست ہوئی، اور اس کامیابی میں افواجِ پاکستان کے ساتھ ساتھ فیلڈمارشل کا کردار کلیدی رہا۔
شہباز شریف نے کہا کہ میں فیلڈمارشل اور افواجِ پاکستان کو خراجِ تحسین پیش کرتا ہوں جنہوں نے وطنِ عزیز کے وقار کو بلند کیا۔ صدر ٹرمپ نے بھی جنگ رکوانے میں کلیدی کردار ادا کیا۔
شہباز شریف نے کہا انہوں نے نئے وزیراعلیٰ خیبرپختونخوا سہیل آفریدی کو مبارکباد دی اور وفاق کی طرف سے صوبے کے تعاون کا یقین دلایا۔
انہوں نے کہا کہ وزیراعلی سے کہاکہ صوبے کی ترقی کے لیے مل کر کام کریں گے اور امید ظاہر کی کہ وزیراعلیٰ سہیل آفریدی وفاق کی پیشکش کا مثبت جواب دیں گے۔
وزیراعظم نے کہا کہ وفاقی حکومت خیبرپختونخوا کی ترقی کے لیے بھرپور تعاون کرے گی تاکہ عوام کی زندگیوں میں بہتری لائی جا سکے۔
وزیراعظم شہباز شریف نے اپنے خطاب میں مزید کہا کہ میاں نواز شریف کو خیبرپختونخوا کے ترقیاتی منصوبوں میں خصوصی دلچسپی ہوتی تھی، اور وہ ہمیشہ اس خطے کی ترقی اور خوشحالی کے لیے کوشاں رہے۔
انہوں نے کہا کہ موجودہ حکومت اسی وژن کو آگے بڑھاتے ہوئے تعلیم اور صحت کے شعبے میں انقلابی اقدامات کر رہی ہے۔
یہ بھی پڑھیں : خیبرپختونخوا کی نئی کابینہ نے حلف اٹھا لیا
تقریب کے اختتام پر وزیراعظم شہباز شریف نے چترال میں ایک جدید ہسپتال بنانے کا اعلان بھی کیا۔
انہوں نے کہا کہ صحت کی سہولیات میں بہتری ان کی حکومت کی ترجیحات میں شامل ہے تاکہ چترال کے عوام کو علاج کے لیے دور دراز علاقوں کا سفر نہ کرنا پڑے۔
وزیراعظم نے کہا کہ وفاقی حکومت تعلیم اور صحت کے منصوبوں پر صوبائی حکومت کے ساتھ مکمل تعاون کرے گی۔
