پاکستان تحریک انصاف (پی ٹی آئی) کے رہنما عمر ایوب نے کہا ہے کہ پی ٹی آئی کاپلڑا بھاری ہے، ہری پور میں 29 میں 29 پولنگ اسٹیشنز پر فتح کا دعویٰ کیا۔
تفصیلات کے مطابق پاکستان تحریک انصاف (پی ٹی آئی) کے رہنما عمر ایوب نے کہا ہے کہ اس بار ہری پور سے بانی عمران خان کی پی ٹی آئی ہی جیتے گی۔ انہوں نے اپنے بیان میں اس یقین کا اظہار کرتے ہوئے کہا کہ پی ٹی آئی کے لیے جیت کا منظر واضح ہے اور پارٹی تمام پولنگ اسٹیشنز میں غالب رہے گی۔
عمر ایوب نے بتایا کہ وہ اس وقت ہری پور کے کھلابٹ سیکٹر ون میں موجود ہیں، جو دو یونین کونسلز پر مشتمل ہے اور یہاں مجموعی طور پر 29 پولنگ اسٹیشنز ہیں۔ انہوں نے کہا کہ 2024 کے الیکشن میں وہ ذاتی وجوہات کی بنا پر موجود نہیں تھے، جبکہ کئی ساتھی جیل میں تھے اور کچھ کے پیچھے پولیس تعاقب میں تھی۔
انہوں نے کہا کہ تمام مشکلات اور سختیوں کے باوجود پی ٹی آئی نے 2024 کے الیکشن میں 29 میں سے 27 پولنگ اسٹیشنز میں کامیابی حاصل کی تھی۔ عمر ایوب نے بتایا کہ ان کے امیدوار نے مسلم لیگ ن کے امیدوار کو 82 ہزار ووٹوں سے شکست دی تھی، جبکہ مسلم لیگ ن کے امیدوار کا اپنا گھر والا پولنگ اسٹیشن بھی ہار گیا تھا۔
عمر ایوب کا کہنا تھا کہ اس بار پی ٹی آئی کھلابٹ کے 29 میں سے 29 پولنگ اسٹیشن جیتے گی۔ انہوں نے واضح کیا کہ اس مرتبہ سب کچھ بالکل واضح ہے اور ہری پور سے صرف پی ٹی آئی ہی کامیاب ہوگی۔
واضح رہے کہ عمر ایوب کو سابقہ قانونی مسائل کے بعد سزا سنائے جانے پر ان کی نشست خالی ہوئی تھی، اور اس مرتبہ اس نشست پر عمر ایوب کی اہلیہ انتخاب لڑ رہی ہیں، جس سے پی ٹی آئی کی جیت کی توقع کو مزید مضبوطی حاصل ہو رہی ہے
