اسلام آباد:چیئرمین پاکستان تحریک انصاف بیرسٹر گوہر نے واضح کیا ہے کہ بانی پی ٹی آئی عمران خان کی فیملی، بالخصوص ان کی بہنوں پر تنقید یا نازیبا جملے پارٹی پالیسی کے سراسر خلاف ہیں، اور ایسے عناصر کے لیے پارٹی میں کوئی گنجائش نہیں۔ ان کا کہنا تھا کہ پارٹی رہنماؤں اور کارکنوں کو ضبط، ذمہ داری اور سیاسی شائستگی کا مظاہرہ کرنا ہوگا۔
اسلام آباد میں میڈیا سے گفتگو کرتے ہوئے بیرسٹر گوہر نے بتایا کہ آج پاکستان تحریک انصاف کے پارلیمنٹیرینز اور صوبائی اسمبلی کے ارکان کی ایک اہم بیٹھک منعقد ہو رہی ہے، جس میں مختلف شعبوں سے تعلق رکھنے والے پروفیسرز اور ماہرین شریک ہوں گے۔
اجلاس میں ملک کو درپیش مسائل اور بہتری کے امکانات پر تفصیلی مشاورت کی جائے گی، جبکہ بانی پی ٹی آئی عمران خان کی صحت سے متعلق امور بھی ایجنڈے کا اہم حصہ ہوں گے۔
انہوں نے کہا کہ اتحاد سے متعلق تاریخ کا اعلان پہلے ہی کیا جا چکا ہے اور پارٹی اپنے طے شدہ مؤقف پر قائم ہے۔ ان کا کہنا تھا کہ پاکستان تحریک انصاف آئندہ لائحہ عمل جمہوری اصولوں کے مطابق طے کرے گی۔
چیئرمین پی ٹی آئی نے 8 فروری کو ملک گیر شٹر ڈاؤن ہڑتال کی اپیل کا اعادہ کرتے ہوئے کہا کہ یہ احتجاج کسی ایک صوبے تک محدود نہیں ہوگا بلکہ پورے پاکستان میں کیا جائے گا۔
انہوں نے عوام سے اپیل کی کہ وہ اس احتجاج میں بھرپور شرکت کریں، تاہم واضح کیا کہ شٹر ڈاؤن ہڑتال مکمل طور پر رضاکارانہ ہوگی اور کسی پر زبردستی نہیں کی جائے گی۔
یہ بھی پڑھیں : بیرونِ ملک روزگار کے خواہشمند پاکستانیوں کے لیے بڑی خوشخبری
بیرسٹر گوہر کا کہنا تھا کہ 8 فروری کا دن جمہوریت کے لیے ایک سیاہ دن ہے، اور اسی مناسبت سے پارٹی اس روز احتجاج کر رہی ہے تاکہ عوامی شعور اجاگر کیا جا سکے۔
انہوں نے ایک بار پھر اس بات پر زور دیا کہ عمران خان کی فیملی کے خلاف بیانات یا ذاتی نوعیت کی تنقید ناقابلِ قبول ہے۔
ان کے مطابق پارٹی کے اندر نظم و ضبط برقرار رکھنے کے لیے سختی کی جائے گی اور ایسے بیانات دینے والوں کے خلاف کارروائی سے گریز نہیں کیا جائے گا۔
