خیبر پختونخوا میں مختلف شاہراہوں کی بندش کے خلاف دائر درخواست پر پشاور ہائیکورٹ میں سماعت ہوئی، جس کے دوران عدالت نے فوری طور پر بند راستے کھولنے کے احکامات جاری کر دیے۔ عدالت کی جانب سے اس سلسلے میں تحریری حکم نامہ بھی جاری کر دیا۔
سماعت کے دوران عدالت نے شہریوں کو درپیش مشکلات پر تشویش کا اظہار کرتے ہوئے قرار دیا کہ عوامی شاہراہوں کی بندش سے نہ صرف روزمرہ زندگی متاثر ہو رہی ہے بلکہ مریضوں، طلبہ اور مسافروں کو بھی شدید مسائل کا سامنا کرنا پڑ رہا ہے۔ عدالت نے ریمارکس دیے کہ ریاستی اداروں کی ذمہ داری ہے کہ وہ شہریوں کے بنیادی حقوق اور آزادانہ نقل و حرکت کو یقینی بنائیں۔
عدالت نے متعلقہ حکام کو ہدایت کی کہ وہ بلا تاخیر تمام بند شاہراہیں کھولیں اور امن و امان کی صورتحال کو برقرار رکھتے ہوئے ٹریفک کی روانی بحال کریں۔ تحریری حکم نامے میں واضح کیا گیا کہ عدالتی احکامات پر فوری اور مؤثر عملدرآمد کیا جائے اور اس حوالے سے رپورٹ بھی عدالت میں پیش کی جائے۔
واضح رہے کہ حالیہ دنوں میں صوبے کے مختلف علاقوں میں راستوں کی بندش کے باعث کاروباری سرگرمیاں متاثر ہوئیں جبکہ عام شہریوں کو آمدورفت میں شدید مشکلات پیش آئیں۔ پشاور ہائیکورٹ کے اس فیصلے کو شہریوں کے لیے ایک اہم پیش رفت قرار دیا جا رہا ہے، جس سے امید کی جا رہی ہے کہ حالات معمول پر آئیں گے اور ٹریفک کی روانی بحال ہوگی۔
