بے نظیر انکم سپورٹ پروگرام کی مالی امداد میں اضافے کی تجویز، کفالت رقم 20 ہزار روپے تک بڑھانے کی سفارش
بے نظیر انکم سپورٹ پروگرام (BISP) کے تحت مستحق خاندانوں کے لیے مالی امداد میں اضافے کی تجویز سامنے آ گئی ہے، جس کے مطابق کفالت پروگرام کی رقم میں نمایاں اضافہ تجویز کیا گیا ہے۔
ذرائع کے مطابق انٹرنیشنل مانیٹری فنڈ (IMF) مشن کی جانب سے کفالت پروگرام کی امدادی رقم میں 5 ہزار 500 روپے اضافے کی سفارش کی گئی ہے، جبکہ اسے بڑھا کر 20 ہزار روپے تک کرنے کی تجویز بھی زیر غور ہے۔
رپورٹ کے مطابق آئی ایم ایف وفد کو کفالت پروگرام میں رجسٹرڈ خاندانوں کے ڈیٹا پر تفصیلی بریفنگ دی گئی، جس میں مالی معاونت کے نظام اور شفافیت سے متعلق امور کا جائزہ بھی شامل تھا۔ پروگرام کی رقم میں اضافے کا امکان ظاہر کیا جا رہا ہے، تاہم حتمی فیصلہ آئندہ مذاکرات میں متوقع ہے۔
دوسری جانب پاکستان اور آئی ایم ایف کے درمیان بجٹ مذاکرات کا اگلا مرحلہ آج ہوگا، جس میں فیڈرل بورڈ آف ریونیو (FBR) کے حکام اور آئی ایم ایف مشن کے درمیان تین اہم ملاقاتیں متوقع ہیں۔ مذاکرات میں ٹیکس اصلاحات اور مالی اہداف سمیت دیگر اہم امور پر غور کیا جائے گا۔
