باجوڑ میں گاڑی میں دھماکہ، ایک شخص جاں بحق، سکیورٹی فورسز نے علاقے کو گھیرے میں لے لیا۔
خیبرپختونخوا کے ضلع باجوڑ کی تحصیل سالارزئی کے علاقے ماندل میں ایک گاڑی میں دھماکے کے نتیجے میں ابتدائی اطلاعات کے مطابق ایک شخص جاں بحق ہوگیا، جبکہ واقعے کے بعد علاقے میں خوف و ہراس پھیل گیا۔
پولیس کے مطابق دھماکا تحصیل سالارزئی کے علاقے ماندل میں ایک گاڑی میں ہوا، جس کے نتیجے میں ایک شخص جان کی بازی ہار گیا۔ تاہم، فوری طور پر جاں بحق ہونے والے شخص کی شناخت اور دھماکے کی وجوہات کے بارے میں تفصیلات جاری نہیں کی گئیں۔
واقعے کی اطلاع ملتے ہی پولیس، سیکیورٹی فورسز اور دیگر متعلقہ اداروں کی ٹیمیں موقع پر پہنچ گئیں اور علاقے کو گھیرے میں لے کر شواہد اکٹھے کرنے کا عمل شروع کر دیا۔ سیکیورٹی اہلکاروں نے جائے وقوعہ کو سیل کرتے ہوئے عام شہریوں کی آمدورفت بھی محدود کر دی۔
پولیس حکام کا کہنا ہے کہ دھماکے کی نوعیت کا تعین کرنے کے لیے مختلف پہلوؤں سے تحقیقات جاری ہیں، جبکہ فرانزک اور بم ڈسپوزل یونٹ کی ٹیمیں بھی جائے وقوعہ سے شواہد اکٹھے کر رہی ہیں۔
حکام کے مطابق واقعے کی مکمل تحقیقات کے بعد ہی دھماکے کی اصل وجوہات اور نوعیت سے متعلق حتمی معلومات جاری کی جائیں گی۔
