پشاور: انسپکٹر جنرل آف پولیس (آئی جی پی) خیبرپختونخوا نے عوامی مفاد کے پیش نظر پولیس کے اعلیٰ افسران کے تقرر و تبادلوں کے احکامات جاری کر دیے ہیں۔
اس حوالے سے باقاعدہ نوٹیفکیشن 28 جولائی 2026 کو جاری کیا گیا، جس کے مطابق تبادلے فوری طور پر نافذ العمل ہوں گے۔
نوٹیفکیشن کے مطابق پی ایس پی گریڈ 20 کے افسر شاکت عباس کو ڈی جی کوآرڈینیشن یونٹ برائے عملدرآمد قانون و امن اقدامات کے عہدے سے تبدیل کرکے کمانڈنٹ پولیس ٹریننگ کالج (PTC) ہنگو تعینات کر دیا گیا ہے۔
اسی طرح پی ایس پی گریڈ 20 کے افسر شیر اکبر، جو اس سے قبل ڈی آئی جی ویلفیئر خیبرپختونخوا کے طور پر خدمات انجام دے رہے تھے، انہیں اپنی موجودہ ذمہ داریوں کے ساتھ ساتھ ڈی جی کوآرڈینیشن یونٹ برائے عملدرآمد قانون و امن اقدامات کا اضافی چارج بھی سونپ دیا گیا ہے۔
یہ بھی پڑھیں : خیبر پختونخوا پولیس میں بڑے پیمانے پر تبادلے اور تقرریاں
نوٹیفکیشن کے مطابق پی ایس پی گریڈ 20 کے افسر رضوان منظور، جو کمانڈنٹ پی ٹی سی ہنگو تعینات تھے، انہیں 125ویں نیشنل مینجمنٹ کورس (NMC) میں شرکت کے سلسلے میں سنٹرل پولیس آفس (CPO) پشاور رپورٹ کرنے کی ہدایت کی گئی ہے۔
اعلامیے میں کہا گیا ہے کہ یہ تقرر و تبادلے خیبرپختونخوا پولیس ایکٹ 2017 کے تحت حاصل اختیارات کو بروئے کار لاتے ہوئے عوامی مفاد میں کیے گئے ہیں اور ان پر فوری طور پر عملدرآمد ہوگا۔
نوٹیفکیشن پر صوبائی پولیس افسر خیبرپختونخوا ذوالفقار حمید (PSP) کے دستخط موجود ہیں، جبکہ اس کی نقول متعلقہ محکموں اور افسران کو ارسال کر دی گئی ہیں۔
