اسلام آباد: وزارت خارجہ (MOFA) نے ملک کے مختلف شہروں میں کونسلر اسسٹنٹ کے عہدے پر 36 خالی آسامیوں کا اعلان کردیا ہے، جس کے لیے اہل امیدواروں سے درخواستیں طلب کی گئی ہیں۔
جاری اعلان کے مطابق یہ ملازمتیں ان امیدواروں کے لیے ہیں جو گریجویشن مکمل کرچکے ہیں اور پبلک سیکٹر ادارے میں ملازمت کے خواہشمند ہیں۔ منتخب امیدواروں کو ابتدائی طور پر ایک سال کے لیے عارضی بنیادوں پر تعینات کیا جائے گا۔
اہلیت اور عمر کی حد
کونسلر اسسٹنٹ کی آسامیوں کے لیے امیدوار کا بیچلرز یا گریجویشن کی تعلیم مکمل کرنا ضروری ہے، جبکہ بنیادی کمپیوٹر مہارت بھی لازمی قرار دی گئی ہے۔
امیدواروں کی عمر 30 سال تک ہونی چاہیے۔ مقررہ معیار پر پورا اترنے والے امیدوار ان آسامیوں کے لیے درخواست دے سکتے ہیں۔
کن شہروں میں تعیناتی ہوگی؟
کامیاب امیدواروں کو پاکستان کے مختلف بڑے شہروں میں تعینات کیا جاسکتا ہے، جن میں اسلام آباد، پشاور، گجرات، لاہور، کراچی اور کوئٹہ شامل ہیں۔
درخواست جمع کرانے کی آخری تاریخ
امیدوار اپنی مکمل درخواست مطلوبہ دستاویزات کے ساتھ 7 ستمبر 2026 تک جمع کراسکتے ہیں۔ درخواستیں مقررہ ای میل کے ذریعے بھیجی جائیں گی۔
یہ بھی پڑھیں : خیبر پختونخوا میں ریلوے منصوبوں کو آگے بڑھانے کے لیے اہم پیش رفت
درخواست بھیجنے کے لیے ای میل ایڈریس hrpcw2026@gmail.com ہے۔ امیدواروں کو ہدایت کی گئی ہے کہ درخواست جمع کرانے سے قبل تمام معلومات اور ضروری دستاویزات مکمل طور پر چیک کرلیں تاکہ نامکمل درخواست کی وجہ سے امیدوار کا کیس متاثر نہ ہو۔
ٹیسٹ اور انٹرویو
اعلان کے مطابق صرف شارٹ لسٹ کیے جانے والے امیدواروں کو ٹیسٹ یا انٹرویو کے لیے بلایا جائے گا، جبکہ ٹیسٹ اور انٹرویو اسلام آباد میں ہوں گے۔
وزارت خارجہ کی جانب سے اعلان کردہ یہ بھرتیاں ملک بھر میں روزگار کے مواقع تلاش کرنے والے گریجویٹس کے لیے اہم موقع ہیں، خصوصاً ان امیدواروں کے لیے جو بنیادی کمپیوٹر مہارت رکھتے ہیں، مقررہ عمر کی حد پر پورا اترتے ہیں اور پبلک سیکٹر میں کام کرنے کے خواہشمند ہیں۔
