پی ٹی آئی کے لانگ مارچ کے دوران سڑک کی بندش پر غصے میں پاکستان کو برا بھلا کہنے والے شہری کی ویڈیو سوشل میڈیا پر وائرل ہوگئی، تاہم بعد میں اسی شخص کی جانب سے معذرت کی ویڈیو بھی سامنے آگئی۔
وائرل ویڈیو میں شہری کو راستہ بند ہونے پر پولیس اہلکار سے شدید تلخ کلامی کرتے دیکھا جاسکتا ہے۔ ڈوگر نامی شہری سڑک کھولنے کیلئے پولیس اہلکار سے بحث کرتا ہے اور کہتا ہے کہ وہ اسی ملک میں رہتا ہے اور سالانہ لاکھوں روپے ٹیکس ادا کرتا ہے۔
ویڈیو کے دوران شہری غصے میں پاکستان کے بارے میں نازیبا الفاظ بھی استعمال کرتا ہے، جبکہ پولیس اہلکار اسے ملک کو برا بھلا نہ کہنے کی تنبیہ کرتا دکھائی دیتا ہے۔
واقعے کی ویڈیو سوشل میڈیا پر وائرل ہونے کے بعد شہری کی ایک اور ویڈیو سامنے آئی، جس میں وہ اپنے سابقہ رویے پر معذرت کرتا دکھائی دیتا ہے۔
شہری نے وضاحت کرتے ہوئے کہا کہ غصے کی حالت میں اس سے جو الفاظ ادا ہوئے، وہ نامناسب تھے، جس پر وہ معذرت خواہ ہے۔
یہ بھی پڑھیں: وزیراعلی سہیل آفریدی نے لانگ مارچ موخر کرنے کا اعلان کردیا
یوں لانگ مارچ کے دوران سڑک کی بندش پر غصے میں دیا گیا بیان پہلے سوشل میڈیا پر وائرل ہوا اور بعد ازاں اسی شخص کی معذرت بھی توجہ کا مرکز بن گئی۔
