شدید بارش، موٹروے کے مختلف حصوں پر مسافر بردار گاڑیوں کا داخلہ بند

پاکستان, پختونخوا ڈیجیٹل, تازہ ترین, موسم / 1 Comment /

اسلام آباد: شدید بارش کے باعث ایم-1 پر اسلام آباد مین ٹول پلازہ سے برہان انٹرچینج تک جبکہ ای-35 پر شاہ مقصود انٹرچینج سے برہان انٹرچینج تک مسافر بردار گاڑیوں کا داخلہ بند کردیا گیا۔

متعلقہ حکام کے مطابق دونوں مقامات پر شدید بارش کے باعث مسافر بردار گاڑیوں کی آمدورفت روکی گئی ہے، جبکہ شہریوں کو موسم کی صورتحال کے پیش نظر سفر میں احتیاط برتنے کی ہدایت کی گئی ہے۔

دوسری جانب پنجاب اور خیبرپختونخوا کے مختلف شہروں میں بھی بادل برس پڑے، جبکہ کئی علاقوں میں ژالہ باری بھی ہوئی۔ اسلام آباد اور راولپنڈی میں تیز ہواؤں کے ساتھ موسلادھار بارش کے باعث نشیبی علاقوں میں پانی جمع ہوگیا۔

راولپنڈی میں شدید بارش کے پیش نظر رین ایمرجنسی نافذ کردی گئی ہے۔ ایم ڈی واسا کے مطابق تمام فیلڈ افسران کو متحرک کردیا گیا ہے، جبکہ واسا کا عملہ اور ہیوی مشینری نشیبی علاقوں میں تعینات کردی گئی ہے۔

حکام کا کہنا ہے کہ نالہ لئی میں پانی کا بہاؤ معمول کے مطابق ہے۔ کٹاریاں کے مقام پر پانی کی سطح 5 فٹ جبکہ گوالمنڈی پل پر 2 فٹ ریکارڈ کی گئی ہے۔

یہ بھی پڑھیں : اسلام آباد اور گردونواح میں طوفانی بارش ، مختلف علاقوں میں مزید بارش کا امکان

اسلام آباد، راولپنڈی، کوہاٹ، کرک، میانوالی اور دنیا پور سمیت مختلف علاقوں میں تیز ہواؤں کے ساتھ موسلادھار بارش ہوئی، جس کے باعث نشیبی علاقوں میں پانی جمع ہوگیا۔

جھنگ، چشمہ دریا خان، کچہ گجرات، پیلاں اور دیگر علاقوں میں بھی بارش ہوئی، جبکہ کندیاں میں بارش کا پانی گھروں میں داخل ہوگیا اور گلی محلے پانی سے بھرنے کے باعث تالاب کا منظر پیش کرنے لگے۔

بارش کے باعث کئی علاقوں میں فیڈر ٹرپ ہونے سے بجلی کی فراہمی بھی معطل ہوگئی، جس سے شہریوں کو مشکلات کا سامنا کرنا پڑا۔

Must Read

Scroll to Top