بنوں کے علاقے میں پیش آنے والے ایک دل دہلا دینے والے اور انتہائی المناک ٹریفک حادثے نے پورے علاقے کو ہلا کر رکھ دیا ہے۔ شادی کی ایک تقریب میں شرکت کے لیے جوش و خروش سے گھر سے نکلنے والے تین نوجوان المناک موت کا شکار ہو گئے، جن میں دو سگے بھائی بھی شامل ہیں۔ اس روح فرسا سانحے نے چند لمحوں میں کئی گھروں کے چراغ گل کر دیے ہیں۔
یہ ہولناک حادثہ اس وقت پیش آیا جب جھنڈوخیل سے تعلق رکھنے والے تینوں نوجوان ایک ہی موٹر سائیکل پر سوار ہو کر شادی کی ایک تقریب میں شرکت کی غرض سے جھنڈوخیل سے بنوں پارک کی طرف رواں دواں تھے۔ راستے میں رفتار اتنی بے قابو تھی کہ موت ان کی تاک میں بیٹھی تھی۔
مبینہ طور پر تیز رفتاری کے باعث موٹر سائیکل بے قابو ہو کر اتنے شدید حادثے کا شکار ہوئی کہ تینوں نوجوانوں کو سنبھلنے کا موقع تک نہ ملا اور وہ موقع پر ہی جان کی بازی ہار گئے۔
اس اندوہناک حادثے میں دنیا سے اچانک کوچ کر جانے والے نوجوانوں کی شناخت ہو چکی ہے۔ اجل کا شکار ہونے والوں میں دو سگے بھائی سفید اللہ خان اورحامد خان پسران شیرداد خان شامل ہیں جبکہ ان کا دوست بیت اللہ خان ولد سعد اللہ خان بھی انہی کے ساتھ لقمہ اجل بن گیا۔
ایک ہی حادثے میں دو جوان بھائیوں اور ان کے دوست کی لاشیں گھر پہنچنے پر کہرام مچ گیا اور والدین کی چیخ و پکار سے پتھر دل بھی موم ہو گئے۔
یہ بھی پڑھیں : بلوچستان میں دو ٹریفک حادثات، 13 افراد جاں بحق، 20 زخمی
جوان سال بیٹوں اور دوست کی اچانک موت کی خبر جنگ کی آگ کی طرح پورے علاقے میں پھیل گئی، جس سے ہر آنکھ اشکبار اور فضا شدید سوگوار ہو گئی۔ غم و اندوہ کے اس ماحول میں تینوں نوجوانوں کی نمازِ جنازہ مقامی شوبک قبرستان میں ادا کی گئی، جہاں ہزاروں سوگواروں نے انتہائی رقت آمیز اور افسردہ ماحول میں انہیں ان کی ابدی آرام گاہوں میں سپردِ خاک کر دیا۔ سڑکوں کی یہ تیز رفتاری ایک بار پھر کئی گھروں کے لیے ناگہانی موت کا پروانہ ثابت ہوئی ہے۔
