یومِ سیاہِ کشمیر کے موقع پر صدرِ مملکت آصف علی زرداری اور وزیراعظم محمد شہباز شریف نے مقبوضہ وادی کے مظلوم کشمیری عوام کے ساتھ پاکستان کی جانب سے مکمل اور غیر متزلزل یکجہتی کا اعادہ کرتے ہوئے کشمیری مردوں، خواتین اور بچوں کی لازوال قربانیوں کو زبردست خراجِ عقیدت پیش کیا ہے۔
صدرِ مملکت آصف علی زرداری نے اپنے خصوصی پیغام میں عالمی برادری پر زور دیا ہے کہ وہ جموں و کشمیر کے دیرینہ تنازع کے فوری اور منصفانہ حل کے لیے اپنا مؤثر کردار ادا کرے۔
انہوں نے واضح کیا کہ 27 اکتوبر کا دن کشمیریوں کی آزادی کی جدوجہد کے حوالے سے پاکستان کی بھرپور اور مسلسل تائید کی تجدید کرتا ہے۔
صدر زرداری کے مطابق مقبوضہ وادی کے عوام مسلسل شدید تنازعات، کڑی پابندیوں اور بنیادی انسانی حقوق سے محرومی کے دردناک حالات کا سامنا کر رہے ہیں تاہم پاکستان ان کی ہر سطح پر اخلاقی، سفارتی اور سیاسی حمایت کو بلا کم وکاست جاری رکھے گا۔
دوسری جانب وزیراعظم محمد شہباز شریف نے اپنے واضح پیغام میں کہا کہ 27 اکتوبر 1947 جموں و کشمیر کی تاریخ کے ایک انتہائی المناک اور سیاہ باب کی یاد تازہ کرتا ہے اور افسوسناک امر یہ ہے کہ 79 برس کا طویل عرصہ بیت جانے کے باوجود کشمیری عوام کو ان کے مسلمہ حقِ خودارادیت سے محروم رکھا جا رہا ہے۔
وزیراعظم شہباز شریف نے کشمیری عوام کی بے مثال جرات اور ثابت قدمی کو خراجِ تحسین پیش کرتے ہوئے کہا کہ ان کی استقامت خودارادیت کی روشن دلیل ہے۔
یہ بھی پڑھیں : مصری پارلیمنٹ کا اہم فیصلہ ، سعودی عرب کیلئے فوجی امداد کی منظوری دے دی
انہوں نے مؤقف اختیار کیا کہ مسئلہ کشمیر کا پائیدار اور منصفانہ حل صرف اور صرف اقوامِ متحدہ کی سلامتی کونسل کی پاس کردہ قراردادوں کی روشنی میں ہی ممکن ہے اور اس تنازع کے حل کے بغیر پورے جنوبی ایشیا میں پائیدار امن و استحکام کا قیام ناگزیر ہے۔
وزیراعظم نے بھی اس عزم کو دہرایا کہ پاکستان ہر فورم پر کشمیریوں کی اخلاقی، سفارتی اور سیاسی پشتیبانی کو جاری و سارِ رکھے گا۔
