فٹبال کے دنیا بھر میں مقبول ترین ایوارڈ “بیلون ڈی اور 2026” کی باضابطہ تقریب سے محض چند گھنٹے قبل اس وقت عالمی سطح پر سنسنی پھیل گئی جب ایوارڈ کی سرکاری ویب سائٹ پر ہیری کین کو فاتح قرار دینے کا مضمون شائع ہو گیا۔ تاہم بعد میں سامنے آنے والی تفاصیل سے معلوم ہوا کہ یہ کوئی فائنل رزلٹ لیک نہیں بلکہ ویب سائٹ کی ایک تکنیکی اور اشاعتی غلطی تھی۔
برطانوی نشریاتی ادارے کے مطابق پیر کی شام گرینچ معیاری وقت کے مطابق 5 بج کر 15 منٹ پر ایوارڈ کی آفیشل ویب سائٹ پر اچانک ’’ہیری کین نے 2026 کا بیلون ڈی اور جیت لیا‘‘ کے عنوان سے ایک مکمل مضمون لائیو ہو گیا۔
اس خبر کے سامنے آتے ہی فٹبال شائقین کے درمیان شدید حیرت پھیل گئی اور سوشل میڈیا پلیٹ فارمز پر فاتح کے نام کو لے کر ایک بحث چھڑ گئی۔
معاملے کی مزید تفتیش اور جانچ پڑتال پر معلوم ہوا کہ یہ پیشرفت صرف ہیری کین تک محدود نہیں تھی بلکہ لامین یامال، کیلیان ایمباپے اور دیگر نامزد امیدواروں کے بارے میں بھی اسی انداز کے مضامین پہلے سے تیار کر کے غلطی سے آن لائن کر دیے گئے تھے۔
صورتحال پر فوری قابو پاتے ہوئے منتظمین کے ترجمان نے باضابطہ وضاحت کی کہ تمام نامزد کھلاڑیوں کے پروفائلز اور ممکنہ جیت کے ڈرافٹ مضامین ویب سائٹ کے سسٹم کی غلطی کی وجہ سے پبلک ہو گئے تھے اور اس کا حتمی نتائج، ووٹنگ یا کھلاڑیوں کی درجہ بندی سے کوئی تعلق نہیں ہے۔
اس وضاحت کے بعد ہیری کین اور کیلیان ایمباپے سے متعلق مضامین کو فوری طور پر ویب سائٹ سے ہٹا دیا گیا۔
یہ بھی پڑھیں : بیرون ملک ملازمتوں کی تصدیق کا سرکاری طریقہ کار جاری
دوسری جانب خواتین کے ایوارڈز کے شعبے میں بھی الیکسیا پوتیاس اور ایوا پاجور کے بارے میں اسی طرح کے مضامین قبل از وقت شائع ہوئے تھے جس کے بعد الیکسیا پوتیاس کو بعد میں خواتین کے بیلون ڈی اور کا باضابطہ فاتح اعلان کیا گیا۔
اس غیر متوقع واقعے اور تکنیکی بریک ڈاؤن نے ایوارڈز کا رسمی اعلان ہونے سے پہلے ہی سوشل میڈیا اور فٹبال کی دنیا میں شدید تجسس، سسپنس اور الجھن پیدا کر دی تھی۔
