وفاقی وزیر برائے پارلیمانی امور ڈاکٹر طارق فضل چوہدری نے کہا ہے کہ صدر مملکت آصف علی زرداری اور وزیراعظم شہباز شریف کی ملاقات کے بعد ملکی سیاست میں مثبت پیشرفت متوقع ہے اور ملک کے وسیع تر مفاد میں بہتر فیصلہ سامنے آئے گا۔
اپنے ایک بیان میں وفاقی وزیر نے واضح کیا کہ قبل از وقت انتخابات کی کوئی گنجائش نہیں موجودہ حکومت اپنی آئینی مدت پوری کرے گی اور عام انتخابات اپنے مقررہ وقت پر ہی منعقد ہوں گے، جبکہ آئین میں موجود ریفرنڈم کے آپشن کا مقصد کسی معاملے پر براہِ راست عوامی رائے معلوم کرنا ہے۔
وفاقی وزیر برائے پارلیمانی امور ڈاکٹر طارق فضل چوہدری نے ملکی سیاسی صورتحال، ریفرنڈم کی آئینی حیثیت اور آئندہ عام انتخابات کے حوالے سے حکومت کا مؤقف بیان کرتے ہوئے کہا ہے کہ صدر آصف زرداری اور وزیراعظم شہباز شریف کے درمیان ہونے والی ملاقات کے نتیجے میں مثبت پیشرفت کی امید ہے اور توقع ہے کہ ملکی مفاد میں بہتر فیصلہ سامنے آئے گا۔
ریفرنڈم سے متعلق جاری بحث پر تبصرہ کرتے ہوئے ڈاکٹر طارق فضل چوہدری نے وضاحت کی کہ ریفرنڈم کا بنیادی مقصد کسی بھی اہم معاملے پر براہِ راست عوام کی رائے معلوم کرنا ہوتا ہے۔
ان کے مطابق ریفرنڈم آئین میں شامل ایک آئینی اور سیاسی آپشن ہے جس کے تحت کسی متنازع معاملے پر براہِ راست عوام سے رجوع کیا جا سکتا ہے تاکہ ان کی منشا جانی جا سکے۔
انہوں نے مزید کہا کہ کسی بھی سیاسی رہنما کے بیان سے آئین میں درج ریفرنڈم کا آپشن غیر آئینی نہیں ہو جاتا اور جب عوامی رائے سامنے آ جائے تو اس پر عملدرآمد کا طریقہ کار بھی طے کیا جا سکتا ہے۔
قبل از وقت انتخابات سے متعلق قیاس آرائیوں کو مسترد کرتے ہوئے وفاقی وزیر برائے پارلیمانی امور نے دوٹوک الفاظ میں کہا کہ انتخابات وقت سے پہلے کرانے کی کوئی وجہ موجود نہیں ہے۔
انہوں نے کہا کہ موجودہ حکومت اپنی آئینی مدت مکمل کرے گی اور انتخابات ضرور اور اپنے مقررہ وقت پر ہی ہوں گے۔
یہ بھی پڑھیں : خیبر پختونخوا پولیس اور یو ایم ٹی لاہور میں بڑا معاہدہ، شہداء کے ورثاء کے لیے 5 کروڑ روپے کا تاریخی تعلیمی پیکج کا اعلان!
ڈاکٹر طارق فضل چوہدری نے اس بات پر بھی زور دیا کہ انتخابات کو ریفرنڈم کا متبادل قرار نہیں دیا جا سکتا کیونکہ دونوں کے مقاصد الگ الگ ہیں۔
ان کا کہنا تھا کہ آئندہ عام انتخابات کو مزید شفاف اور غیر جانبدار بنانے کے لیے انتخابی اصلاحات کمیٹی بھی قائم کی جا چکی ہے تاکہ انتخابی عمل پر تمام فریقین کا اعتماد یقینی بنایا جا سکے۔





