بانی تحریک انصاف عمران خان کی بہن علیمہ خان نے کہا ہے کہ ان کے دونوں بیٹے محض اس لیے زیرحراست ہیں کیونکہ وہ عمران خان کے خاندان سے تعلق رکھتے ہیں۔
لاہور میں میڈیا سے گفتگو کرتے ہوئے علیمہ خان کا کہنا تھا کہ میرے بیٹوں کا جرم صرف یہ ہے کہ وہ بانی پی ٹی آئی کے خاندان کا حصہ ہیں۔
انہوں نے بتایا کہ ان کے دونوں بیٹے اس وقت حراست میں ہیں، اور انہیں یہ اطلاع دی گئی ہے کہ اب انہیں (علیمہ خان کو) بھی گرفتار کرنے کا ارادہ ظاہر کیا جا چکا ہے۔
علیمہ خان نے اپنے بیان میں مزید کہا’’جتنی سزائیں سنانی ہیں سنا دیں، ہم سب تیار ہیں۔‘‘ساتھ ہی انہوں نے یہ مؤقف بھی اپنایا کہ’’جن لوگوں نے واقعی عمارتوں کو آگ لگائی، انہیں ضرور سزا ملنی چاہیے، قانون اپنا راستہ لے۔‘‘
ان کا کہنا تھا کہ انصاف سب کے لیے برابر ہونا چاہیے، اور سیاسی انتقام کی بنیاد پر کارروائیاں انصاف کے اصولوں کی نفی ہیں۔
