ملک میں سونے کی قیمت نے ایک بار پھر نیا ریکارڈ قائم کر دیا ہے۔ فی تولہ سونے کی قیمت میں 6,100 روپے کا زبردست اضافہ ریکارڈ کیا گیا ہے جس کے بعد یہ تاریخ کی بلند ترین سطح یعنی 384,000 روپے تک پہنچ گئی ہے۔ یہ حیران کن اضافہ ملکی اور عالمی منڈی میں سونے کی بڑھتی ہوئی طلب اور مہنگائی کا عکاس ہے۔
آل صرافہ ایسوسی ایشن کے مطابق، پاکستان میں 24 کیرٹ سونے کی قیمت میں مسلسل اضافہ جاری ہے اور دس گرام سونے کی قیمت بھی 5,230 روپے بڑھ کر 329,219 روپے تک پہنچ گئی ہے۔ اس کے ساتھ ساتھ چاندی کی قیمت نے بھی اپنی تاریخ کی بلند ترین سطح عبور کر لی ہے، جہاں فی تولہ چاندی کی قیمت 23 روپے اضافے کے بعد 4,338 روپے ہوگئی ہے۔
نجی ٹی وی چینل (سما نیوز)کے مطابق عالمی سطح پر بھی سونے کی قیمتوں میں تیزی دیکھی گئی ہے، جہاں انٹرنیشنل گولڈ مارکیٹ میں فی اونس سونا 61 ڈالر مہنگا ہو کر 3,613 ڈالر کی سطح پر پہنچ گیا ہے۔ اس کے باعث ملک میں سونا خریداروں کی پہنچ سے دور ہوتا جا رہا ہے اور عوام کو مہنگائی کے باعث ہاتھ ملتے رہنے پر مجبور ہونا پڑ رہا ہے۔
ماہرین کا کہنا ہے کہ عالمی منڈی میں سونے کی قیمتوں میں اتار چڑھاؤ اور ملکی معاشی حالات کی وجہ سے قیمتی دھاتوں کی قیمتوں میں مزید اضافہ متوقع ہے، جس کے باعث سرمایہ کار اور عام خریدار دونوں کو چوکنا رہنے کی ضرورت ہے۔
