ملک بھر کے ایئرپورٹس پر انتظامی اور فنی مسائل کے باعث قومی و نجی ایئر لائنز کی پروازوں کے شیڈول شدید متاثر ہوئے، جس کے نتیجے میں 13 پروازیں منسوخ جبکہ 44 پروازیں تاخیر کا شکار ہو گئیں۔
قومی اخبار(روزنامہ جنگ ویب سائٹ)کیمطابق قومی ایئر لائن (PIA) کا ایک اے ٹی آر طیارہ فنی خرابی کا شکار ہو گیا، جس کے نتیجے میں کراچی سے گوادر، تربت اور سکھر جانے والی پروازیں منسوخ کر دی گئیں۔ اسی طیارے کی خرابی کے سبب کراچی کی مجموعی طور پر 6 پروازیں منسوخ ہوئیں۔
فلائٹ شیڈول کے مطابق:
کراچی سے دبئی جانے والی قومی ایئر کی دو پروازیں PK-213 اور PK-214 منسوخ کی گئیں۔لاہور سے دبئی اور اسلام آباد سے ابوظبی کی پروازیں بھی منسوخ ہوئیں۔پشاور سے دبئی اور ابوظبی جانے والی تین پروازیں بھی اڑان نہ بھر سکیں۔
پروازوں میں تاخیر کی تفصیلات:
اسلام آباد سے کوالالمپور جانے والی پرواز PK-894 میں 12 گھنٹے تاخیر ہوئی۔پشاور سے شارجہ، دبئی، ریاض اور جدہ کی چار پروازیں 1 سے 8 گھنٹے تک تاخیر کا شکار ہوئیں۔اسلام آباد سے اسکردو کی چار پروازوں میں 3 سے 5 گھنٹے تاخیر ہوئی۔کراچی کی 6 اور لاہور کی 14 پروازوں کو 1 سے 6 گھنٹے کی تاخیر کا سامنا رہا۔جدہ سے کراچی آنے والی نجی ایئر لائن کی پرواز ER-811 بھی 10 گھنٹے تاخیر سے روانہ ہوئی
ذرائع کے مطابق ایئر لائنز نے مسافروں کو متبادل پروازوں یا رقوم کی واپسی کی پیشکش کی ہے، تاہم بڑی تعداد میں مسافر ایئرپورٹس پر شدید مشکلات کا شکار رہے۔
ایوی ایشن ذرائع کا کہنا ہے کہ طیاروں کی دستیابی، عملے کی کمی، اور فنی خرابیوں جیسے مسائل شیڈول میں بگاڑ کا باعث بنے، جب کہ مسافروں نے بروقت اطلاع نہ ملنے پر انتظامیہ کی کارکردگی پر سوالات اٹھائے ہیں۔
