پاکستان تحریک انصاف (پی ٹی آئی) کی رہنما صنم جاوید کے مبینہ اغوا کا مقدمہ پشاور کے تھانہ شرقی میں درج کر لیا گیا ہے۔
پولیس کو دی گئی ایف آئی آر کے مطابق، صنم جاوید کو پشاور کی ایک مصروف شاہراہ پر روکا گیا جہاں پانچ نامعلوم افراد نے زبردستی انہیں گاڑی میں بٹھایا اور لے گئے۔ واقعہ کے وقت صنم جاوید کے ہمراہ کچھ دیگر خواتین بھی موجود تھیں، جن کے سامنے یہ واقعہ پیش آیا۔
اس واقعے سے قبل پی ٹی آئی کے سیکریٹری اطلاعات شیخ وقاص اکرم نے سوشل میڈیا پر دعویٰ کیا تھا کہ صنم جاوید کو پشاور سے اغوا کیا گیا ہے۔ ان کے مطابق، دو گاڑیوں نے صنم جاوید کی گاڑی کا راستہ روکا اور نامعلوم افراد نے انہیں زبردستی گاڑی سے نکال کر ساتھ لے گئے۔
واقعے کی رپورٹ درج ہونے کے بعد پولیس نے معاملے کی تفتیش شروع کر دی ہے۔ تاہم تاحال صنم جاوید کی موجودہ صورتحال یا ان کی بازیابی سے متعلق کوئی سرکاری بیان سامنے نہیں آیا۔
پی ٹی آئی رہنماؤں اور کارکنان نے واقعے پر شدید تشویش کا اظہار کرتے ہوئے فوری تحقیقات اور صنم جاوید کی بازیابی کا مطالبہ کیا ہے۔
