اسلام آباد: حکومتِ پاکستان کے بینظیر انکم سپورٹ پروگرام (BISP) نے مستحق خاندانوں کی درست نشاندہی اور مالی معاونت کی فراہمی کے لیے ڈائنامک سروے میں اندراج کا طریقہ کار جاری کر دیا ہے۔
اس سروے کے ذریعے ایسے خاندان بھی شامل کیے جائیں گے جو پہلے پروگرام میں رجسٹرڈ نہیں تھے یا جن کی معلومات میں تازہ کاری ضروری ہے۔
حکام کے مطابق ڈائنامک سروے میں رجسٹریشن کے لیے اہل افراد کو اپنے قریبی BISP دفتر سے رابطہ کرنا ہوگا۔ سروے کے دوران نادرا کے ذریعے درخواست گزار کی شناخت کی تصدیق کی جائے گی تاکہ فراہم کردہ معلومات کی درستگی یقینی بنائی جا سکے۔
سروے میں آنے والے افراد سے گھر کے حالات، آمدنی، روزگار اور دیگر سماجی و معاشی معلومات کے بارے میں سوالات کیے جائیں گے۔ درخواست گزار کو اپنے خاندان کے تمام افراد کی تفصیلات فراہم کرنا ہوں گی تاکہ ڈیٹا درست طریقے سے سسٹم میں درج کیا جا سکے۔
بینظیر انکم سپورٹ پروگرام کے حکام نے بتایا کہ رجسٹریشن مکمل ہونے کے بعد فراہم کردہ معلومات کی جانچ پڑتال کی جائے گی اور اہل افراد کو پروگرام میں شامل کیا جائے گا۔ اگر کوئی خاندان اہلیت کے معیار پر پورا اترتا ہے تو اسے مالی معاونت کے لیے منتخب کر لیا جائے گا۔
یہ بھی پڑھیں : ایران سے پاکستانیوں کا تفتان کے راستے انخلا، 1979 افراد پاکستان پہنچ گئے
عوام کو ہدایت کی گئی ہے کہ وہ اپنی رجسٹریشن کی صورتحال معلوم کرنے کے لیے 8171 سروس استعمال کریں۔ شہری اپنے شناختی کارڈ نمبر کے ذریعے اس سروس سے معلومات حاصل کر سکتے ہیں۔
BISP حکام نے زور دیا کہ رجسٹریشن کے وقت درست معلومات فراہم کرنا انتہائی ضروری ہے، کیونکہ غلط یا نامکمل معلومات کی صورت میں درخواست مسترد ہو سکتی ہے۔ درخواست گزار کو اپنے اصل شناختی کارڈ اور ضروری دستاویزات ساتھ لے کر آنا ہوگا تاکہ عمل میں کسی قسم کی دشواری پیش نہ آئے۔
حکومت کا کہنا ہے کہ اس سروے کا مقصد زیادہ سے زیادہ مستحق خاندانوں کو مالی معاونت فراہم کرنا اور ملک میں سماجی تحفظ کے نظام کو مزید مضبوط بنانا ہے۔
