حکومت کی جانب سے بینظیر انکم سپورٹ پروگرام (بی آئی ایس پی) میں ایک بڑا اقدام اٹھایا گیا ہے، جس کے تحت جنوری 2027 سے ہر خاندان کو دی جانے والی رقم 14,500 روپے سے بڑھا کر 19,500 روپے کر دی جائے گی۔ اس فیصلے سے لاکھوں مستحق خاندانوں کے لیے زندگی میں سکون اور مالی استحکام کی امید پیدا ہو گئی ہے
میڈیا رپورٹ کے مطابق مالی سال 2026 کے اختتام تک مزید 2 لاکھ خاندان پروگرام میں شامل کیے جائیں گے، جس کے بعد مجموعی طور پر مستفید گھرانوں کی تعداد 1 کروڑ 2 لاکھ تک پہنچ جائے گی۔ ذرائع کے مطابق یہ اقدام پسماندہ طبقے کی مالی مدد اور سماجی تحفظ کے نظام کو مضبوط بنانے کے لیے اٹھایا گیا ہے۔
ذرائع نے بتایا کہ عالمی مالیاتی دباؤ اور آئی ایم ایف کی جانب سے پٹرولیم مصنوعات پر سبسڈی نہ دینے کے مطالبے کے باوجود حکومت نے اپنی مالی پوزیشن کے مطابق صوبوں کو ہدایت دی ہے کہ وہ اپنے بجٹ سے پسماندہ طبقے کے لیے ٹارگٹڈ سبسڈی فراہم کریں۔ اس کے علاوہ حکومت نے کسانوں کے تحفظ کے لیے آئندہ مالی سال کھاد پر فیڈرل ایکسائز ڈیوٹی (FED) نہ لگانے کا بھی فیصلہ کیا ہے۔
بی آئی ایس پی کے حوالے سے مزید بتایا گیا کہ حکومت نے آئی ایم ایف کو تحریری یقین دہانی کرائی ہے کہ پروگرام کے تحت مستفید ہونے والے گھرانوں کی تعداد میں اضافہ کیا جاتا رہے گا، تاکہ زیادہ سے زیادہ خاندان اس سے مستفید ہو سکیں۔
یہ تاریخی اضافہ نہ صرف ہزاروں خاندانوں کی مالی مشکلات میں کمی لائے گا بلکہ مستحق افراد کی زندگی میں خوشی اور سکون کی ایک کرن بھی ثابت ہوگا۔
