جمعیت علمائے اسلام (ف) کے مرکزی سیکرٹری جنرل اور سابق ڈپٹی چیئرمین سینیٹ مولانا عبدالغفور حیدری کو طبیعت ناساز ہونے پر ایک بار پھر ہسپتال منتقل کر دیا گیا ہے۔
ذرائع کے مطابق مولانا عبدالغفور حیدری کو گزشتہ رات دل کی تکلیف کے باعث کوئٹہ کے ایک ہسپتال لایا گیا، جہاں ڈاکٹروں نے ان کا طبی معائنہ کیا اور ضروری علاج شروع کر دیا۔
یہ پہلا موقع نہیں کہ انہیں دل کے عارضے کے باعث ہسپتال منتقل کیا گیا ہو۔ اس سے قبل رواں سال فروری میں بھی دل کا دورہ پڑنے کے بعد انہیں ہسپتال میں داخل کیا گیا تھا، جہاں کامیاب علاج کے بعد انہیں گھر جانے کی اجازت دے دی گئی تھی۔
مولانا عبدالغفور حیدری ملک کی مذہبی اور سیاسی حلقوں میں ایک اہم شخصیت سمجھے جاتے ہیں۔ وہ جمعیت علمائے اسلام (ف) کے مرکزی سیکرٹری جنرل ہیں اور ماضی میں سینیٹ کے ڈپٹی چیئرمین سمیت کئی اہم عہدوں پر خدمات انجام دے چکے ہیں۔
ہسپتال ذرائع کے مطابق ڈاکٹرز ان کی صحت کی مسلسل نگرانی کر رہے ہیں، تاہم ان کی موجودہ طبی حالت کے حوالے سے مزید تفصیلات تاحال جاری نہیں کی گئیں۔
سیاسی و مذہبی حلقوں کی جانب سے مولانا عبدالغفور حیدری کی جلد صحت یابی کے لیے نیک خواہشات اور دعاؤں کا اظہار کیا جا رہا ہے۔
