مریدکے: کالا خطائی روڈ پر سدھانوالی کے قریب پیش آنے والے افسوسناک ٹریفک حادثے میں دو مسافر بسیں بے قابو ہو کر کھیتوں میں جاگریں، جس کے نتیجے میں 4 افراد جاں بحق جبکہ 10 سے زائد مسافر زخمی ہوگئے۔
ریسکیو 1122 کے مطابق حادثہ اس وقت پیش آیا جب لاہور اور نارووال جانے والی دو مسافر بسوں کے ڈرائیوروں نے سڑک پر موجود ایک کار اور موٹرسائیکل کو بچانے کی کوشش کی۔ اس دوران دونوں بسیں اپنا توازن برقرار نہ رکھ سکیں اور سڑک سے اتر کر قریبی کھیتوں میں جا گریں۔
حادثے کی اطلاع ملتے ہی ریسکیو 1122 اور پولیس کی ٹیمیں فوری طور پر موقع پر پہنچ گئیں اور امدادی کارروائیاں شروع کر دیں۔
ریسکیو اہلکاروں نے زخمیوں کو ابتدائی طبی امداد فراہم کرنے کے بعد قریبی اسپتالوں منتقل کیا، جہاں بعض زخمیوں کی حالت تشویشناک بتائی جا رہی ہے۔
یہ بھی پڑھیں : مولانا فضل الرحمان کا کشمیر دھرنے پر عوامی ایکشن کمیٹی کے نام اہم پیغام جاری
ریسکیو حکام کے مطابق حادثے میں اب تک 4 افراد کے جاں بحق ہونے کی تصدیق ہوئی ہے، جبکہ 10 سے زائد افراد زخمی ہوئے ہیں۔ امدادی ٹیمیں متاثرین کو بروقت طبی امداد کی فراہمی کے لیے جائے حادثہ پر سرگرم رہیں۔
پولیس نے واقعے کی تحقیقات شروع کر دی ہیں اور حادثے کی وجوہات کا مختلف پہلوؤں سے جائزہ لیا جا رہا ہے۔ ابتدائی معلومات کے مطابق حادثہ گاڑیوں کو بچانے کی کوشش کے دوران پیش آیا، تاہم حتمی وجہ تحقیقات مکمل ہونے کے بعد سامنے آئے گی۔
حادثے کے بعد علاقے میں افسوس کی فضا پھیل گئی، جبکہ ریسکیو اور پولیس اہلکار قانونی کارروائی مکمل کرنے اور صورتحال کی نگرانی میں مصروف رہے۔
