عالمی منڈی میں خام تیل کی قیمتوں میں ایک بار پھر اضافہ ریکارڈ کیا گیا ہے، جس کے بعد برینٹ خام تیل کی قیمت 94 ڈالر فی بیرل سے تجاوز کرگئی، جبکہ امریکی ڈبلیو ٹی آئی خام تیل بھی 87 ڈالر فی بیرل کی سطح پر پہنچ گیا۔
رائٹرز کے مطابق عالمی مارکیٹ میں تیل کی قیمتوں میں حالیہ اضافے کی بڑی وجہ مشرقِ وسطیٰ میں جاری کشیدگی اور عالمی سپلائی میں ممکنہ رکاوٹوں کے خدشات ہیں۔
تازہ اعداد و شمار کے مطابق امریکی WTI خام تیل کی قیمت 87.06 ڈالر فی بیرل ہوگئی، جس میں 23 سینٹ یعنی 0.26 فیصد اضافہ ہوا۔ اسی طرح برطانوی برینٹ خام تیل 94.39 ڈالر فی بیرل ریکارڈ کیا گیا، جو 61 سینٹ یا 0.65 فیصد اضافے کے برابر ہے۔
دوسری جانب اماراتی تیل کی قیمت 103.50 ڈالر فی بیرل تک پہنچ گئی، جس میں 2.42 ڈالر یعنی 2.39 فیصد اضافہ ریکارڈ کیا گیا۔ قدرتی گیس کی قیمت بھی 2.773 ڈالر تک پہنچ گئی، جس میں 0.040 ڈالر یعنی 1.46 فیصد اضافہ ہوا۔
مشرق وسطیٰ کی کشیدگی سے تیل کی منڈی متاثر
عالمی سطح پر تیل کی قیمتوں میں اضافے کی بنیادی وجہ مشرق وسطیٰ میں بڑھتی ہوئی جغرافیائی و سیاسی کشیدگی کو قرار دیا جارہا ہے۔ امریکہ کی جانب سے ایران کے ساتھ تجارت کرنے والے ممالک پر مزید اقتصادی پابندیاں عائد کرنے کی دھمکی کے بعد عالمی مارکیٹ میں ایران کی تیل برآمدات متاثر ہونے کے خدشات بڑھ گئے ہیں۔
رائٹرز کے مطابق آبنائے ہرمز میں تیل اور دیگر توانائی مصنوعات کی ترسیل معمول سے کم سطح پر ہے، جس سے عالمی سپلائی کے حوالے سے تشویش پیدا ہوئی ہے۔ آبنائے ہرمز دنیا کے اہم ترین توانائی کے راستوں میں شمار ہوتی ہے اور یہاں طویل رکاوٹ عالمی تیل کی قیمتوں پر براہ راست اثر ڈال سکتی ہے۔
ماہرین کے مطابق اگر خطے میں کشیدگی مزید بڑھی اور تیل کی ترسیل متاثر ہوئی تو خام تیل کی قیمتوں میں مزید تیزی آسکتی ہے، تاہم امریکہ، متحدہ عرب امارات اور وینزویلا سمیت دیگر ذرائع سے اضافی سپلائی عالمی منڈی میں کسی حد تک توازن برقرار رکھنے میں مدد دے رہی ہے۔
حالیہ اضافے کے بعد خام تیل کی قیمتوں میں ہفتہ وار بنیاد پر بھی نمایاں تیزی دیکھی گئی۔ برینٹ کی قیمت میں ہفتے کے دوران تقریباً 6.39 فیصد جبکہ ڈبلیو ٹی آئی میں 5.66 فیصد اضافہ ریکارڈ کیا گیا، جس سے عالمی تیل مارکیٹ میں مسلسل دوسرے ہفتے بھی تیزی کا رجحان برقرار رہنے کی نشاندہی ہوتی ہے۔
پاکستان میں پیٹرولیم مصنوعات مزید مہنگی ہونے کا امکان
عالمی منڈی میں خام تیل کی قیمتوں میں اضافہ پاکستان کے لیے بھی اہمیت رکھتا ہے، کیونکہ ملک اپنی توانائی کی ضروریات پوری کرنے کے لیے بڑی مقدار میں پیٹرولیم مصنوعات درآمد کرتا ہے۔
عالمی خام تیل کی قیمت، فریٹ، ڈالر کے مقابلے میں روپے کی قدر، درآمدی لاگت، ٹیکسز اور دیگر اخراجات مقامی سطح پر پیٹرولیم مصنوعات کی قیمتوں پر اثرانداز ہوتے ہیں۔
پاکستان میں حکومت نے 21 اگست 2026 سے پیٹرول کی قیمت میں 3.81 روپے فی لیٹر جبکہ ہائی اسپیڈ ڈیزل کی قیمت میں 3.59 روپے فی لیٹر اضافہ کیا تھا۔
عالمی منڈی میں خام تیل کی قیمتیں موجودہ بلند سطح پر برقرار رہنے یا مزید اضافے کی صورت میں پاکستان میں بھی پیٹرولیم مصنوعات کی قیمتوں پر مزید دباؤ آنے کا امکان ہے۔
