بنگلادیش : آسٹریلیا کے خلاف ٹیسٹ سیریز برابر کرنے کے بعد بنگلہ دیش نے ٹیسٹ رینکنگ میں بڑی چھلانگ لگاتے ہوئے تاریخ کی بہترین چھٹی پوزیشن حاصل کرلی، جبکہ پاکستان تنزلی کے بعد آٹھویں نمبر پر چلا گیا۔
آسٹریلیا اور بنگلہ دیش کے درمیان دو ٹیسٹ میچوں کی سیریز 1-1 سے برابر رہی، جس کے بعد بنگلہ دیش کو رینکنگ میں قیمتی پوائنٹس ملے اور وہ تین درجے بہتری کے ساتھ چھٹے نمبر پر پہنچ گیا۔ سری لنکا ساتویں جبکہ پاکستان آٹھویں پوزیشن پر موجود ہے۔
موجودہ آئی سی سی ٹیسٹ ٹیم رینکنگ میں آسٹریلیا بدستور پہلے نمبر پر ہے، جنوبی افریقا دوسرے اور نیوزی لینڈ تیسرے نمبر پر موجود ہے۔ بھارت چوتھی جبکہ انگلینڈ پانچویں پوزیشن پر ہے۔
بنگلہ دیش نے آسٹریلیا کے خلاف سیریز کا آغاز شاندار انداز میں کیا۔ پہلے ٹیسٹ میں مہمان ٹیم نے آسٹریلیا کو 9 وکٹوں سے شکست دے کر آسٹریلوی سرزمین پر اپنی پہلی ٹیسٹ فتح حاصل کی، جو بنگلہ دیش کرکٹ کے لیے ایک تاریخی کامیابی قرار دی گئی۔
یہ بھی پڑھیں : پاکستان میں ایپل کی آمد کے امکانات روشن، امریکی قونصل جنرل نے اہم اشارہ دے دیا
تاہم آسٹریلیا نے دوسرے ٹیسٹ میں زبردست واپسی کرتے ہوئے بنگلہ دیش کو ایک اننگز اور 51 رنز سے شکست دے دی۔ اس فتح کے باوجود سیریز 1-1 سے برابر رہی اور بنگلہ دیش رینکنگ میں اہم پوائنٹس حاصل کرنے میں کامیاب ہوگیا۔
دوسری جانب پاکستان کی ٹیسٹ رینکنگ میں تنزلی کا سلسلہ جاری ہے۔ قومی ٹیم کو تین ٹیسٹ میچوں کی سیریز کے پہلے میچ میں میزبان انگلینڈ کے ہاتھوں بھاری شکست کا سامنا کرنا پڑا، جس کے بعد پاکستان ایک درجے مزید نیچے چلا گیا۔
بنگلہ دیش کا چھٹی پوزیشن پر پہنچنا ٹیسٹ کرکٹ میں اس کی اب تک کی بہترین رینکنگ ہے، جبکہ پاکستان کا آٹھویں نمبر پر آنا قومی ٹیم کے لیے تشویش کا باعث بن گیا ہے۔
رینکنگ میں بہتری کے لیے پاکستان کو آئندہ ٹیسٹ میچوں میں فتوحات کے ساتھ مضبوط حریفوں کے خلاف مسلسل بہتر کارکردگی دکھانا ہوگی۔
