امریکی صدر ڈونلڈ ٹرمپ نے دعویٰ کیا ہے کہ ایران شدت کے ساتھ امریکہ کے ساتھ معاہدہ کرنے کا خواہاں ہے اور وائٹ ہاؤس اس حوالے سے مذاکرات کے آپشن پر غور کے لیے تیار ہے۔
سماجی رابطے کی ویب سائٹ ’’ٹروتھ سوشل‘‘ پر جاری اپنے ایک بیان میں امریکی صدر نے دعویٰ کیا کہ معاشی اور سیاسی بحران کا شکار ایران اب ہر قیمت پر اور جلد از جلد ایک ڈیل چاہتا ہے۔
انہوں نے واضح کیا کہ ایران کے ساتھ بات چیت کا آغاز کرنے یا نہ کرنے کا حتمی فیصلہ وہ خود کریں گے، تاہم فی الوقت امریکہ نے مذاکرات کا راستہ یکسر بند نہیں کیا اور اس آپشن کو کھلا رکھا ہوا ہے۔
امریکی صدر نے ایران کے ساتھ جاری کشیدگی اور جنگ پر بات کرتے ہوئے توقع ظاہر کی کہ یہ تنازع رواں برس ہی منطقی انجام کو پہنچ جائے گا۔
یہ بھی پڑھیں: امریکہ میں مڈٹرم انتخابات کے بعد ایران جنگ فوری ختم ہو جائے گی، امریکی صدر کا بڑا اعلان
امریکی صدر ٹرمپ کا کہنا تھا کہ ایران جنگ کے خاتمے کے فوراً بعد بین الاقوامی مارکیٹ میں پیٹرولیم مصنوعات کی قیمتوں میں نمایاں کمی آئے گی اور قیمتیں تیزی سے نیچے گریں گی۔
ڈونلڈ ٹرمپ نے مزید کہا کہ خطے میں امریکی حکمتِ عملی کے تحت بالآخر امریکہ وہاں سے نکل جائے گا، تاہم اگر وینزویلا کی طرز پر وہاں موجود رہ کر تیل کے وسائل کا کنٹرول سنبھالنے کا کوئی فیصلہ کیا گیا تو صورتِ حال مختلف ہو سکتی ہے۔
