بیورو آف امیگریشن اینڈ اوورسیز ایمپلائمنٹ نے جرمنی میں کام اور رہائش کے خواہشمند ہنرمند اور تعلیم یافتہ افراد کے لیے رہائشی اجازت نامے سے متعلق اہم تفصیلات جاری کردی ہیں۔
بیورو کے مطابق جرمنی کی مضبوط معیشت اور مختلف شعبوں میں افرادی قوت کی بڑھتی ہوئی ضرورت کے باعث دنیا بھر سے باصلاحیت اور ہنرمند افراد کے لیے کام اور رہائش کا باقاعدہ راستہ موجود ہے۔
جاری معلومات کے مطابق اس رہائشی اجازت نامے کا مقصد ایسے تعلیم یافتہ اور باصلاحیت افراد کو جرمنی میں مواقع فراہم کرنا ہے جو اپنی پیشہ ورانہ مہارت کے ذریعے ملکی معیشت اور افرادی قوت کی ضروریات پوری کرنے میں کردار ادا کرسکتے ہیں۔
بیورو کے مطابق وہ افراد اس اجازت نامے کے لیے درخواست دے سکتے ہیں جن کے پاس ایسی تعلیمی قابلیت یا پیشہ ورانہ اہلیت ہو جو جرمنی میں تسلیم شدہ تعلیمی معیار کے مساوی قرار دی جاسکے۔
یہ بھی پڑھیں : پشاور: سرحد چیمبر کے انتخابات، 20 نشستوں پر 40 امیدوار آمنے سامنے
معلومات میں بتایا گیا ہے کہ بعض شعبوں، بالخصوص صحت سے متعلق پیشوں میں کام کرنے کے لیے اضافی شرائط پوری کرنا اور متعلقہ لائسنس حاصل کرنا بھی ضروری ہوتا ہے۔ ایسے شعبوں میں دلچسپی رکھنے والے افراد کو اپنی پیشہ ورانہ قابلیت اور ضروری اجازت ناموں سے متعلق تمام مقررہ تقاضے پورے کرنا ہوں گے۔
بیورو آف امیگریشن اینڈ اوورسیز ایمپلائمنٹ کے مطابق رہائشی اجازت نامے کے لیے درخواست دینے والے شخص کے پاس جرمنی میں کسی ادارے یا کمپنی کی جانب سے واضح اور مستند ملازمت کی پیشکش ہونا بھی لازمی ہے۔
ملازمت درخواست گزار کی تعلیم، تربیت یا پیشہ ورانہ مہارت سے متعلق ہونی چاہیے۔ اس کے علاوہ امیدوار کی قابلیت اور ملازمت کی نوعیت کے درمیان مطابقت کو بھی اہم قرار دیا گیا ہے۔
یہ بھی پڑھیں : جرمنی میں طیارہ گرکر تباہ، خاتون سمیت 3 افراد ہلاک
بیورو نے بتایا کہ متعلقہ شعبے میں تعلیم یا تربیت کے تقاضوں کے ساتھ بعض پیشوں میں اضافی پیشہ ورانہ اور لائسنسنگ شرائط بھی عائد ہوسکتی ہیں، جنہیں درخواست دینے سے قبل پورا کرنا ضروری ہوگا۔
بیورو کے مطابق جرمنی کی جانب سے ہنرمند افرادی قوت کے لیے مواقع پیدا کرنے کی پالیسی کے تحت یہ رہائشی اجازت نامہ ان افراد کے لیے ایک اہم راستہ ہے جو اپنی تعلیم اور پیشہ ورانہ مہارت کو بروئے کار لاتے ہوئے جرمنی میں ملازمت حاصل کرنا چاہتے ہیں۔
بیورو آف امیگریشن اینڈ اوورسیز ایمپلائمنٹ نے ہدایت کی ہے کہ جرمنی میں ملازمت کے خواہشمند افراد درخواست دینے سے پہلے اپنی تعلیمی اسناد، پیشہ ورانہ اہلیت، ملازمت کی پیشکش اور متعلقہ شعبے کی دیگر لازمی شرائط کا اچھی طرح جائزہ لے لیں تاکہ رہائشی اجازت نامے کے لیے مقررہ تقاضے پورے کیے جاسکیں۔
