سندھ جنت بن چکا ہے اور کراچی پر دنیا رشک کرتی ہے، خواجہ آصف کا بلاول بھٹو کے 18 سالہ دورِ اقتدار پر کڑی تنقید

اسلام آباد:وزیر دفاع خواجہ آصف نے چیئرمین پیپلز پارٹی بلاول بھٹو زرداری کی جانب سے سسٹم ری سیٹ کرنے اور موجودہ سیاسی نظام پر تنقید کرنے کے بیان پر سخت ردعمل کا اظہار کرتے ہوئے کہا ہے کہ اس معاملے پر پارلیمان میں بحث ضرور ہوگی، تاہم کسی بھی نظام کو اس وقت تک تبدیل یا ری سیٹ نہیں کیا جا سکتا جب تک اسے عوامی تائید حاصل نہ ہو۔

سماجی رابطے کی ویب سائٹ ایکس پر اپنے ایک تفصیلی بیان میں بلاول بھٹو کو مخاطب کرتے ہوئے وزیر دفاع نے کہا کہ عوام کو ان کے بنیادی حق سے محروم نہیں کیا جا سکتا اور پارلیمان کے ساتھ ساتھ عوامی رائے بھی لازمی طور پر معلوم کی جانی چاہیے۔ ان کا کہنا تھا کہ سیاست دانوں کا احتساب کوئی نئی بات نہیں ہے اور نہ ہی کوئی سیاست دان احتساب سے بالاتر ہے۔

خواجہ آصف نے بلاول بھٹو کی پریس کانفرنس کو دھواں دار قرار دیتے ہوئے کہا کہ اس میں موجودہ حکومت اور نظام کو نشانہ بنایا گیا، لیکن سیاست دانوں کو عوام سے رجوع کرنے کے طریقہ کار کو چور دروازہ قرار نہیں دینا چاہیے کیونکہ سیاست دانوں کی اصل بنیاد عوامی رائے ہے۔

 انہوں نے زور دیا کہ عوامی ریفرنڈم اور پارلیمان کے اندر بحث و مباحثے پر کوئی قدغن نہیں ہونی چاہیے، اور اگر پارلیمان کے ساتھ عوامی رائے بھی معلوم کرلی جائے تو اس عمل کو بھرپور جمہوری جواز حاصل ہو جائے گا۔

یہ بھی پڑھیں : تین دہائیوں کی لوٹ مار نے سندھ کو کھنڈر بنا دیا، ہسپتال تباہ، سڑکیں غائب اور پیپلز پارٹی کے رہنما وڈیروں کی طرح قابض، شہریوں کا سخت ردعمل

وزیر دفاع نے سندھ حکومت کی کارکردگی پر کڑے سوالات اٹھاتے ہوئے بلاول بھٹو کو آڑے ہاتھوں لیا اور طنز کرتے ہوئے کہا کہ سندھ میں گزشتہ 18 برس سے پیپلز پارٹی کی حکومت ہے اور بظاہر سندھ جنت بن چکا ہے، جبکہ کراچی کی حالت بھی ایسی ہے کہ دنیا اس پر رشک کرتی ہے۔

 مسلم لیگ (ن) کی حکومت میں پیپلز پارٹی کی شراکت داری کا حوالہ دیتے ہوئے خواجہ آصف کا کہنا تھا کہ بلاول بھٹو 2022 سے حکومتی معاملات میں برابر کے شریک ہیں، لیکن اس شراکت کا المیہ یہ ہے کہ اس کا فائدہ ہمیشہ پیپلز پارٹی کو ملتا ہے جبکہ اس کا نقصان مسلم لیگ (ن) یا پاکستان کو برداشت کرنا پڑتا ہے۔

ایک معروف قانونی اصول کا حوالہ دیتے ہوئے وزیر دفاع نے دوٹوک انداز میں سوال اٹھایا کہ جو شخص انصاف اور مساوات کا دعویٰ کرتا ہے، اس کے اپنے ہاتھ بھی صاف ہونے چاہییں؛ لہٰذا کیا بلاول بھٹو کے ہاتھ صاف ہیں اور کیا انہیں دوسروں کو لیکچر دینے یا دھمکیاں دینے کا حق حاصل ہے؟

خواجہ آصف نے اس عزم کا اعادہ کیا کہ حکومت کا بنیادی مقصد پاکستان کے عوام کے حالات بہتر بنانا، عام آدمی کو عزت کی زندگی فراہم کرنا اور حکمرانی میں عوام کی شراکت کو عملی شکل دینا ہے۔

یہ بھی پڑھیں : باپ کو تاحیات استثنیٰ کے مزے دلوانے کے بعد اسی ترمیم کو “جبری” کہنا، بلاول بھٹو کا دوہرا معیار ان کی سیاسی پستی کا منہ بولتا ثبوت

حکمرانوں کی طاقت عوام کی امانت ہوتی ہے، کسی کی میراث نہیں، اور عوام کے حقوق کو صرف آئین کی کتاب تک محدود نہیں رہنا چاہیے۔

 انہوں نے مزید کہا کہ پاکستان کی تاریخ میں سفارتی اور دفاعی محاذوں پر ملک کو عزت اور تکریم حاصل ہوئی ہے، اور اب حکمرانی کو گلی محلوں کی سطح تک منتقل کرنے کی جدوجہد جاری ہے جس میں عوامی رائے اور پارلیمان کا کردار مکمل طور پر جمہوری اور آئینی ہے۔

 انہوں نے اپنے مؤقف کے آخر میں واضح کیا کہ حکمرانی کسی کی اجارہ داری نہیں بلکہ ملک کے 25 کروڑ عوام کو یہ حق حاصل ہے کہ وہ معاملات میں اپنی رائے اور فیصلہ سازی کے عمل میں بھرپور طور پر شریک ہوں۔

Scroll to Top