انسداد دہشت گردی عدالت نے 26 نومبر 2022 کے احتجاج سے متعلق کیس میں پاکستان تحریک انصاف (پی ٹی آئی) کے دو غیر حاضر ملزمان کے وارنٹ گرفتاری جاری کرتے ہوئے کیس کی سماعت 15 جولائی تک ملتوی کر دی۔
انسداد دہشت گردی عدالت اسلام آباد کے جج طاہر عباس سپرا نے پی ٹی آئی کارکنان کے خلاف تھانہ کوہسار میں درج مقدمے کی سماعت کی، جو 26 نومبر کو اسلام آباد میں ہونے والے احتجاج کے دوران پیش آنے والے واقعات کے حوالے سے درج کیا گیا تھا۔
سماعت کے دوران بعض ملزمان عدالت میں پیش نہ ہوئے، جس پر عدالت نے دو غیر حاضر افراد کے قابل ضمانت وارنٹ گرفتاری جاری کر دیے۔ عدالت نے آئندہ سماعت پر تمام ملزمان کی حاضری یقینی بنانے کی ہدایت کرتے ہوئے قرار دیا کہ اگلی پیشی پر چالان کی نقول ملزمان کو فراہم کی جائیں گی۔
عدالت میں وکلا مرتضیٰ حسین طوری، سردار مصروف، آمنہ علی، زاہد بشیر ڈار سمیت دیگر نے پیش ہو کر دلائل دیے۔ وکلا نے مؤقف اختیار کیا کہ اکثر ملزمان کو ابھی تک چالان کی نقول نہیں دی گئیں، جس پر عدالت نے آئندہ تاریخ مقرر کر دی۔
ذرائع کے مطابق، اس مقدمے میں سابق خاتون اول بشریٰ بی بی سمیت تحریک انصاف کی اعلیٰ قیادت کو بھی نامزد کیا گیا ہے، تاہم تاحال عدالت میں صرف کارکنان کے خلاف چالان جمع کرایا گیا ہے۔
کیس کی مزید سماعت اب 15 جولائی کو ہوگی، جس میں عدالت چالان کی نقول تقسیم کرے گی اور پیشی کے لیے تمام ملزمان کو حاضری یقینی بنانے کی ہدایت کی گئی ہے۔
