ڈیرہ اسماعیل خان میں خفیہ اطلاعات کی بنیاد پر سیکیورٹی فورسز نے دہشتگردوں کے ٹھکانوں کو نشانہ بناتے ہوئے 7 بھارتی سپانسرڈ دہشتگردوں کو ہلاک کر دیا ہے۔
پاک فوج کے شعبہ تعلقات عامہ کے مطابق 20 ستمبر 2025 کو سیکیورٹی فورسز نے ڈیرہ اسماعیل خان کے علاقے کلاچی میں بھارتی سپانسرڈ فتنہ الخوارج کی موجودگی کی خفیہ اطلاع پر ایک موثر آپریشن کیا۔
آئی ایس پی آر کا کہنا ہے کہ آپریشن کے دوران فورسز نے دہشتگردوں کے ٹھکانے کو نشانہ بنایا اور 7 بھارتی سپانسرڈ خوارج بشمول تین افغان نژاد خوارج اور دو خودکش حملہ آوروں کو ہلاک کر دیا۔
آئی ایس پی آر کا کہنا ہے کہ پاک بھارت سرحدی علاقے میں دہشتگردی کے خاتمے کے لیے آپریشن جاری رکھے گا اور علاقے میں کسی بھی دیگر بھارتی سپانسرڈ دہشتگرد کو ختم کرنے کے لیے صفائی مہم چلائی جا رہی ہے۔
آئی ایس پی آر کے مطابق پاکستان نے عبوری افغان حکومت سے توقع ظاہر کی ہے کہ وہ اپنی ذمہ داریاں پوری کرے گی اور اپنی سرزمین کو پاکستان کے خلاف دہشتگردی کی سرگرمیوں کے لیے استعمال نہیں ہونے دے گی۔
آئی ایس پی آر کا کہنا ہے کہ پاکستان کی سیکیورٹی فورسز بھارتی سپانسرڈ دہشتگردی کے خاتمے کے لیے پرعزم ہیں اور ملک کو اس دہشتگردی کے ناسور سے پاک کرنے کے لیے ہر ممکن اقدامات جاری رکھے ہوئے ہیں۔
یہ بھی پڑھیں: ڈی جی آئی ایس پی آر کا کیڈٹ کالج پلندری کا دورہ، طلباء و اساتذہ سے خصوصی نشست
وزیراعظم شہباز شریف نے ڈیرہ اسماعیل خان میں فتنہ الخوارج کے خلاف کامیاب آپریشن پر سیکیورٹی فورسز کی کارکردگی کو سراہتے ہوئے کہا ہے کہ آپریشن میں 7 دہشتگرد جہنم واصل کیے گئے جو دہشتگردی کے خلاف جنگ میں ایک اہم کامیابی ہے۔
وزیراعظم نے کہا کہ پوری قوم دہشتگردی کے خاتمے کے لیے سیکیورٹی فورسز کے ساتھ کھڑی ہے اور ملک سے دہشتگردی کے مکمل خاتمے کے لیے حکومت اور سیکیورٹی ادارے پرعزم ہیں۔
