اپوزیشن اتحاد کا جمعہ سے احتجاجی تحریک کا اعلان، 27 ویں ترمیم پر حکومت کے خلاف احتجاجی مظاہرے متوقع ہے۔
تفصیلات کے مطابق اپوزیشن اتحاد کے سربراہ محمود خان اچکزئی نے اعلان کیا ہے کہ جمعہ سے وہ حکومت کے خلاف احتجاجی تحریک شروع کریں گے۔ اسلام آباد میں میڈیا سے گفتگو کے دوران محمود اچکزئی اور دیگر اپوزیشن رہنماؤں نے کہا کہ یہ تحریک 27 ویں آئینی ترمیم سمیت دیگر اہم قومی امور پر مرکوز ہوگی۔
اپوزیشن رہنماؤں نے واضح کیا کہ وہ مذاکرات کے لیے تیار ہیں، مگر شرط یہ ہے کہ حکومت ان کا مینڈیٹ واپس کرے۔ انہوں نے کہا’’ہم ہر قسم کے مذاکرات کے لیے تیار ہیں، مگر مذاکرات کا نکتہ یہی ہوگا کہ ہمارا مینڈیٹ واپس دیا جائے۔‘‘
واضح رہے کہ قومی اسمبلی نے گزشتہ روز 27 ویں آئینی ترمیم کا بل دو تہائی اکثریت سے منظور کیا۔ اس ترمیم کے نئے متن کو آج سینیٹ میں بھی منظوری کے لیے پیش کیا جائے گا تاکہ آئینی طریقہ کار مکمل ہو سکے۔
یہ پیش رفت ملک میں سیاسی ماحول کو مزید کشیدہ کرنے کا سبب بن سکتی ہے، کیونکہ اپوزیشن اتحاد نے حکومت کی آئینی ترمیمات پر شدید تحفظات کا اظہار کیا ہے اور عوامی سطح پر احتجاجی مظاہروں کی کال دے دی ہے۔
