اسلام آباد: قومی اسمبلی کی بزنس ایڈوائزری کمیٹی کا اجلاس آج طلب کر لیا گیا ہے، جو سہ پہر 4 بجے پارلیمنٹ ہائوس میں ہوگا۔ اجلاس کی صدارت اسپیکر قومی اسمبلی سردار ایاز صادق کریں گے۔
اجلاس میں پارلیمانی کارروائی کو خوش اسلوبی سے چلانے کے طریقوں پر غور کیا جائے گا، جبکہ تمام پارلیمانی جماعتوں کے پارلیمانی لیڈرز اور چیف وہپس بھی اجلاس میں شرکت کریں گے۔
وفاقی وزیر قانون اور وفاقی وزیر برائے پارلیمانی امور بھی اس موقع پر موجود رہیں گے۔ تمام پارلیمانی جماعتوں کے رہنماؤں کو اجلاس کے بارے میں باضابطہ طور پر آگاہ کر دیا گیا ہے۔
دوسری جانب سینیٹ کا اجلاس بھی آج شام 4 بجے طلب کر لیا گیا ہے۔ سینیٹ سیکرٹریٹ کی جانب سے جاری کردہ ایجنڈا کے مطابق ایوان بالا کے اجلاس میں 23 نکات زیرِ غور آئیں گے۔
ایجنڈے میں شامل اہم نکات میں شامل ہیں:
وفاقی ملازمین بینیولنٹ فنڈ اور گروپ انشورنس ترمیمی بل
آئینی ترمیمی بل، 2026
فوجداری قوانین ترمیمی بل، 2023
انسدادِ انسانی سمگلنگ ترمیمی بل، 2024
انسدادِ الیکٹرانک جرائم ترمیمی بل، 2024
پاکستان پینل کوڈ ترمیمی بل، 2024
سینیٹ سیکرٹریٹ کے مطابق یہ اجلاس ملکی قانون سازی کے اہم اقدامات کا حصہ ہے اور اس میں قومی اور بین الاقوامی قوانین سے متعلق اہم تجاویز پر غور کیا جائے گا۔
یہ بھی پڑھیں : وفاقی حکومت نے سال 2026 کی سرکاری تعطیلات کا اعلان کر دیا
یہ اجلاس دونوں ایوانوں کے لیے اہم تصور کیے جا رہے ہیں، کیونکہ اس دوران متعدد اہم قانونی ترامیم پیش کی جائیں گی، جن کا اثر ملکی پارلیمانی اور انتظامی امور پر براہِ راست پڑے گا۔
