وزیراعلیٰ ہاؤس میں داخلی امور میں غیر معمولی تبدیلیوں کے باعث بھونچال سا محسوس کیا جا رہا ہے، کیونکہ وزیراعلیٰ سہیل آفریدی نے ایک بڑے کلین اپ آپریشن کا آغاز کر دیا ہے۔ اس آپریشن میں داخلی سکیورٹی اور انتظامی عملے کی مکمل چھان بین شامل ہے۔
ذرائع کے مطابق، اس کارروائی کے دوران ایک ہی جھٹکے میں سپیشل برانچ کی پوری ٹیم کو فارغ کر دیا گیا اور نئی تقرریوں اور انتظامی تبدیلیوں کا عمل شروع کر دیا گیا۔ یہ اقدام وزیراعلیٰ کے داخلی صفائی اور سکیورٹی کے معیار کو بہتر بنانے کے لیے اہم قرار دیا جا رہا ہے۔
مزید بتایا گیا ہے کہ فرنٹیئر ریزرو پولیس کے 53 نئے اہلکار وزیراعلیٰ ہاؤس میں تعینات کیے گئے ہیں تاکہ سکیورٹی نظام مزید مستحکم ہو اور کسی بھی ممکنہ خطرے یا خلل کی صورت میں فوری ردعمل ممکن بنایا جا سکے۔
ذرائع کا کہنا ہے کہ یہ اقدام ایسے وقت میں کیا گیا جب اندر کی خبریں باہر آنے کے بعد ہاؤس میں انتظامی اور سکیورٹی ماحول میں غیر یقینی صورتحال پیدا ہو گئی تھی۔ اس بڑے کلین اپ آپریشن سے نہ صرف انتظامی شفافیت میں اضافہ ہوگا بلکہ ہاؤس میں موجود عملے اور سکیورٹی اہلکاروں کی کارکردگی اور معیار بھی بلند ہوگا۔
وزیر اعلیٰ سہیل آفریدی کے اس ایکشن کو داخلی نظم و ضبط کو بہتر بنانے اور موجودہ نظام کو مضبوط کرنے کے لیے فیصلہ کن اقدام قرار دیا جا رہا ہے۔
