پشاور: پشاور میں شادی کی ایک تقریب اس وقت خوف اور افراتفری میں بدل گئی جب ہوائی فائرنگ اور آتش بازی کے باعث پولیس نے کارروائی کرتے ہوئے دولہے کو گرفتار کر لیا۔
پولیس کے مطابق واقعہ تھانہ بھانہ ماڑی کی حدود میں پیش آیا، جہاں ایک شادی کی تقریب کے دوران مبینہ طور پر دولہا اور دیگر افراد کی جانب سے بے تحاشہ آتش بازی اور ہوائی فائرنگ کی گئی۔
پولیس حکام کا کہنا ہے کہ گرفتار ملزم، جو کوٹلہ محسن خان کا رہائشی ہے، اپنی ہی شادی کی تقریب میں اسلحے کی نمائش اور فائرنگ میں مصروف تھا۔
اس صورتحال کے باعث علاقے میں شدید خوف و ہراس پھیل گیا، جبکہ قریبی گھروں میں موجود خواتین، بچے اور بزرگ سخت پریشانی کا شکار ہو گئے۔
عینی شاہدین کے مطابق شادی کی خوشی چند ہی لمحوں میں خطرناک صورتحال میں تبدیل ہو گئی، کیونکہ اندھا دھند فائرنگ کسی بھی وقت بڑے حادثے کا سبب بن سکتی تھی۔ شہریوں نے بتایا کہ اس نوعیت کے واقعات پہلے بھی کئی مرتبہ قیمتی جانوں کے ضیاع کا باعث بن چکے ہیں۔
اطلاع ملنے پر پولیس موقع پر پہنچ گئی اور فوری کارروائی کرتے ہوئے ملزم کو حراست میں لے لیا۔ پولیس نے گرفتار شخص کے خلاف مقدمہ درج کر کے تفتیش کا آغاز کر دیا ہے۔
یہ بھی پڑھیں : آئی فون 18 پرو اور پرو میکس کب لانچ ہوں گے؟ تاریخ سامنے آگئی
پولیس حکام کا کہنا ہے کہ پشاور میں ہوائی فائرنگ اور اسلحے کی نمائش کسی صورت برداشت نہیں کی جائے گی اور اس کے خلاف بلاامتیاز کارروائیاں جاری رہیں گی۔
ان کا مزید کہنا تھا کہ قانون کی خلاف ورزی کرنے والوں کے خلاف سخت ایکشن لیا جائے گا تاکہ شہریوں کی جان و مال کا تحفظ یقینی بنایا جا سکے۔
دوسری جانب مقامی شہریوں نے پولیس کی بروقت کارروائی کو سراہتے ہوئے مطالبہ کیا ہے کہ شادی بیاہ کی تقریبات میں اس طرح کے خطرناک رجحانات کا مکمل خاتمہ کیا جائے تاکہ خوشیاں کسی بڑے حادثے یا المیے میں تبدیل نہ ہوں۔
