محکمہ موسمیات نے ملک کے بیشتر علاقوں میں آج بھی شدید گرمی اور خشک موسم برقرار رہنے کی پیشگوئی کرتے ہوئے شہریوں کو احتیاطی تدابیر اختیار کرنے کی ہدایت جاری کر دی ہے۔
محکمہ موسمیات کے مطابق ملک کے بیشتر میدانی علاقوں میں موسم گرم اور خشک رہے گا، جبکہ وسطی اور جنوبی علاقوں میں درجہ حرارت معمول سے کئی ڈگری زیادہ رہنے کا امکان ہے۔ پنجاب، سندھ، جنوبی بلوچستان اور بالائی خیبرپختونخوا کے مختلف علاقوں میں گرمی کی شدت برقرار رہنے کی توقع ظاہر کی گئی ہے۔
ماہرین موسمیات نے شہریوں کو ہدایت کی ہے کہ وہ شدید دھوپ اور گرمی کے اوقات میں غیر ضروری طور پر گھروں سے باہر نکلنے سے گریز کریں، پانی کا زیادہ استعمال کریں اور بچوں، بزرگوں اور بیمار افراد کا خصوصی خیال رکھیں۔
دوسری جانب محکمہ موسمیات نے آج رات سے 31 مئی تک ملک کے بالائی اور وسطی علاقوں میں موسم کی صورتحال تبدیل ہونے کی پیشگوئی بھی کی ہے۔ رپورٹ کے مطابق مغربی ہواؤں کا ایک نیا سلسلہ ملک کے شمالی حصوں میں داخل ہوگا جس کے باعث مختلف علاقوں میں آندھی، تیز ہواؤں اور گرج چمک کے ساتھ بارش متوقع ہے۔
محکمہ موسمیات کے مطابق خیبرپختونخوا، کشمیر، گلگت بلتستان اور بالائی پنجاب کے مختلف اضلاع میں بارش کا امکان موجود ہے، جبکہ بعض مقامات پر تیز ہواؤں اور گرج چمک کے باعث مقامی سطح پر نقصانات کا بھی خدشہ ظاہر کیا گیا ہے۔
حکام نے متعلقہ اداروں کو الرٹ رہنے اور شہریوں کو موسم کی تازہ صورتحال سے باخبر رکھنے کی ہدایت جاری کر دی ہے۔
