درآمدات میں اضافہ، وافر اسٹاک اور کم طلب کے باعث آئندہ دنوں میں قیمتوں میں مزید استحکام یا معمولی کمی کا امکان بھی ظاہر کیا جا رہا ہے۔
کراچی میں سولر سسٹمز کی قیمتوں میں نمایاں کمی دیکھنے میں آئی ہے، جس کے بعد سولر پینلز، بیٹریاں اور انورٹرز پہلے کے مقابلے میں سستے ہوگئے ہیں۔ مارکیٹ ذرائع کے مطابق شہر کی الیکٹرانکس مارکیٹ میں مختلف سولر مصنوعات کی قیمتوں میں واضح کمی ریکارڈ کی گئی ہے۔
میڈیا رپورٹس کے مطابق لیتھیم بیٹریوں کی قیمتوں میں تقریباً 20 ہزار روپے تک کمی آئی ہے، جبکہ انورٹرز 10 ہزار روپے تک سستے ہوئے ہیں۔ اسی طرح سولر پلیٹس کی قیمتوں میں بھی فی پلیٹ تقریباً 3 ہزار روپے کی کمی دیکھی گئی ہے۔
تاجروں کے مطابق بجٹ سے قبل بعض ڈیلرز نے ممکنہ ٹیکسوں اور افواہوں کے باعث قیمتوں میں اضافہ کر دیا تھا، جبکہ کچھ کاروباری افراد نے زیادہ منافع کے لیے سولر مصنوعات کو ذخیرہ بھی کر لیا تھا۔ تاہم وفاقی بجٹ میں سولر سسٹمز پر کوئی اضافی ٹیکس عائد نہ ہونے کے بعد مارکیٹ کی صورتحال تبدیل ہوگئی۔
مارکیٹ ذرائع کے مطابق درآمدات میں اضافے اور وافر اسٹاک کی دستیابی کے باعث رسد اور طلب کا فرق کم ہوا، جبکہ خریداروں کی جانب سے خریداری میں کمی نے بھی قیمتوں کو نیچے لانے میں اہم کردار ادا کیا۔
اس وقت مارکیٹ میں 585، 645 اور 720 واٹ کی سولر پلیٹس تقریباً 45 روپے فی واٹ کے حساب سے فروخت ہو رہی ہیں، جبکہ چند روز قبل یہی قیمت تقریباً 50 روپے فی واٹ تھی۔ 5 کلو واٹ کی لیتھیم بیٹریاں تقریباً 2 لاکھ 30 ہزار روپے میں دستیاب ہیں، جبکہ 3 سے 5 کلو واٹ کے انورٹرز کی قیمتیں 1 لاکھ 20 ہزار روپے سے 3 لاکھ روپے کے درمیان ہیں۔
تاجروں کا کہنا ہے کہ اگر موجودہ سپلائی برقرار رہی اور طلب میں غیر معمولی اضافہ نہ ہوا تو آئندہ دنوں میں سولر مصنوعات کی قیمتوں میں مزید استحکام یا معمولی کمی کا امکان موجود ہے۔
