ٹیک کمپنی ایپل کے نئے لانچ ہونے والے آئی فون 18 پرو اور آئی فون 18 پرو میکس کے ماڈلز استعمال کرنے والے صارفین کے لیے بُری خبر سامنے آئی ہے جہاں ڈیوائسز میں ایک بڑی سافٹ ویئر خرابی (بگ) کی نشاندہی ہوئی ہے۔
یہ مسئلہ ماڈلز کی باضابطہ فروخت شروع ہونے کے فوراً بعد سامنے آیا، جس پر صارفین کی جانب سے مسلسل شکایات درج کرائی جا رہی تھیں۔ رپورٹس کے مطابق جب صارف فیس آئی ڈی (Face ID) کے ذریعے فون ان لاک کرنے کی کوشش کرتا ہے اور وہ ناکام ہو جاتی ہے تو فون چند سیکنڈز کے لیے مکمل طور پر فریز (جام) ہو جاتا ہے اور ٹچ بالکل کام کرنا بند کر دیتا ہے۔ اس کے فوراً بعد ڈیوائس خود بخود بند ہو کر دوبارہ آن (ریسٹارٹ) ہو جاتی ہے۔
ایپل نے اس مسئلے کی باضابطہ تصدیق کرتے ہوئے کہا ہے کہ متاثرہ ماڈلز کی خرابی کو دور کرنے کے لیے فوری طور پر حل پر کام شروع کر دیا گیا ہے۔ کمپنی نے اعلان کیا ہے کہ اس مسئلے کو آنے والی نئی iOS 27 سافٹ ویئر اپ ڈیٹ کے ذریعے مکمل طور پر ختم کر دیا جائے گا۔
اگرچہ ایپل نے فیس آئی ڈی کی ناکامی کی اصل تکنیکی وجہ فی الحال نہیں بتائی تاہم کمپنی کا کہنا ہے کہ یہ مسئلہ تمام نہیں بلکہ چند مخصوص صارفین کو پیش آ رہا ہے۔ آئندہ اپ ڈیٹ جاری ہونے کے بعد متاثرہ فونز فریز ہونے اور غیر متوقع طور پر ریسٹارٹ ہونے سے محفوظ ہو جائیں گے۔
