پاکستان کے دارالحکومت میں تفریح اور سیاحت کے شعبے میں ایک نئے اور انقلابی دور کا آغاز ہونے جا رہا ہے۔ اسلام آباد میں ملک کا اپنی نوعیت کا پہلا منفرد تھیم پارک پروجیکٹ تعمیر کیا جا رہا ہے جس کے لیے سعودی عرب کے سرمایہ کاروں نے بھاری سرمایہ کاری کرنے کا فیصلہ کیا ہے۔
اس سلسلے میں سعودی سرمایہ کاروں اور کیپیٹل ڈویلپمنٹ اتھارٹی (سی ڈی اے) کے درمیان ایک تاریخی مفاہمتی یادداشت (ایم او یو) پر باضابطہ دستخط کر دیے گئے ہیں۔
اس اہم نوعیت کے معاہدے کی دستخطی تقریب لاہور کے تاریخی قذافی اسٹیڈیم میں منعقد ہوئی۔ تقریب کے مہمانِ خصوصی وفاقی وزیرداخلہ اور پاکستان کرکٹ بورڈ کے چیئرمین محسن نقوی تھے۔
معاہدے پر سعودی-پاکستان بزنس کونسل کے چیئرمین شہزادہ منصور بن محمد آل سعود اور سی ڈی اے کے چیئرمین سہیل اشرف نے دستخط کیے۔
اس شاندار تقریب میں سی ڈی اے کے اعلیٰ حکام اور سعودی وفد کے معزز نمائندگان بھی بھرپور طریقے سے شریک ہوئے۔
اس معاہدے کے تحت طے پایا ہے کہ سعودی سرمایہ کار اسلام آباد میں بننے والے اس جدید ترین تھیم پارک پروجیکٹ کے لیے تمام تر فنانسنگ (سرمایہ کاری) فراہم کریں گے۔
دوسری جانب سی ڈی اے اس بڑے منصوبے کی تعمیر کے لیے مطلوبہ زمین فراہم کرے گی۔
تقریب سے خطاب کرتے ہوئے وفاقی وزیرداخلہ محسن نقوی نے سعودی وفد کا پُرجوش خیرمقدم کیا اور شہزادہ منصور بن محمد آل سعود کو اس شاندار منصوبے پر مبارکباد دی۔
انہوں نے کہا کہ اسلام آباد کے بنیادی ڈھانچے کو دنیا کے صفِ اول کے شہروں کے ہم پلہ لانے کے لیے تیزی سے کام جاری ہے۔
محسن نقوی نے سعودی سرمایہ کاروں کو مکمل یقین دلایا کہ انہیں ہر ممکنہ سہولت اور معاونت فراہم کی جائے گی اور اس تھیم پارک کو دارالحکومت کے لیے ایک حقیقی “گیم چینجر” قرار دیا۔
یہ بھی پڑھیں : سپارکو اسلام آباد میں اقوام متحدہ کے اشتراک سے 5 روزہ عالمی کانفرنس کی میزبانی کرے گا
انہوں نے یہ بھی انکشاف کیا کہ آنے والے مہینوں میں مزید سرمایہ کاری کے مواقع تلاش کرنے کے لیے سعودی عرب میں ایک رئیل اسٹیٹ روڈ شو کا انعقاد بھی کیا جائے گا۔
دوسری جانب شہزادہ منصور بن محمد آل سعود نے اپنے خطاب میں کہا کہ پاکستان بالخصوص اسلام آباد سرمایہ کاری کے لیے انتہائی پُرکشش اور شاندار مواقع فراہم کرتا ہے۔
